अन्नपूर्ण प्रथममा नेपाली महिलाको पहिलो पाइला

३ वैशाख, काठमाडौं । अन्नपूर्ण प्रथम ८०९१ मि को नेपाली महिलाले पहिलोपटक सफल आरोहण गरेका छन् । नेपाली महिला आरोहीको समुहले शुक्रबार दिउँसो साढे १ बजे आरोहण पुरा गरेको सेभेन समिट ट्रेक्सले बताएको छ ।

सेभेन समिट ट्रेक्सका अध्यक्ष निग्मा शेर्पाका अनुसार दिउँसो साढे १ बजे नेपाली महिला समुहले आरोहण पुरा गरेका हुन् । उनका अनुसार आरोहणमा पूर्णिमा श्रेष्ठ, दावा याङजुङ शेर्पा, दावा फुटि शेर्पा र पासाङल्यामु शेर्पा रहेका छन् । अन्नपूर्ण प्रथममा नेपाली महिलाको पहिलो पाइला परेको हो ।

अन्नपूर्ण प्रथम आरोहण निकै नै चूनौतीपूर्ण छ । विहीबार राती १० बजे ६९०० मिटरको क्याम्पबाट आरोहणको टोली हिडेको थियो । दिउँसो साढे १ बजे महिला सहितका आरोही टिम चुचुरोमा पुगेको हाे । सेभेन समिटबाट मात्र महिला सहित अरु विदेशी पनि आरोहणमा थिए । सेभेन समिटका अरु २२ जना विदेशीले पनि आरोहण गरेका छन् ।

अन्य कम्पनिको व्यवस्थापनमा गएका आरोही पनि आरोहणको क्रममा रहेको उनले जानकारी दिए । अन्नपूर्ण आरोहणका लागि एकमहिना अघि नै विदेशी सहितको टोली आधारशिविर क्षेत्रमा पुगेर अभ्यास गरिरहेको छ ।

आरोहणको यो सफलताले नेपालको हिमाल आरोहण क्षेत्रको पहिचान बढाउने उनले बताए । अर्को कम्पनि इमेजिन नेपालबाट गएका विदेशी र नेपाली गरि १५ जना आरोहीसहित  ५ जना विदेशी र १० जना नेपालीले आरोहण पुरा गरेका हुन् ।

आरोही विदेशीमध्ये २ जना चिनियाँ, २ जना पाकिस्तानी र एकजना अमेरिकी छन् । बाँकी १० जना नेपाली पुरुष आरोहीले पनि आरोहण पुरा गरेका छन् ।