संक्रमण रोकथाममा एमाले कमिटी परिचालन

४ वैशाख, राँझा ।  नेकपा ‘एमाले’ बाँकेले कोरोना भाइरस संक्रमण रोकथामका लागि जिल्लाव्यापीरूपमा मातहतका कमिटीलाई परिचालन गरेको छ । पार्टीका वडास्तरमा रहेका कमिटीको नेतृत्वमा टोलटोलसम्म पुग्ने गरी कोरोना भाइरस सङ्क्रमण रोकथामको सचेतना अभियान सञ्चालन शुरु गरिएको एमाले बाँकेका अध्यक्ष सूर्य ढकालले जानकारी दिए ।

उनका अनुसार अभियानअन्तर्गत पार्टीका वडास्तरमा रहेका वडा कमिटीले प्रत्येक वडामा मास्क प्रयोग, स्यानिटाइजर, सामाजिक दूरी कायम गर्ने, शङ्कास्पद बिरामीको उपचार व्यवस्थामा सहयोगी भूमिका निर्वाह गर्नेछन् ।

जिल्लाका आठ स्थानीय तहमा रहेका ८१ वटै वडामा रहेका पार्टी कमिटीका अध्यक्ष र सचिवलाई आवश्यक तयारी र परामर्शसहित आजदेखि कार्यक्षेत्रमा खटाइएको अध्यक्ष ढकालको भनाइ छ । “पार्टीको वडा कमिटीले स्थानीय तहले सञ्चालन गरेका कोरोना भाइरसविरुद्धको अभियानमा समेत सहकार्य र सहयोगी भूमिका निर्वाह गर्नेछन्”, उनले भने।