लुम्विनी प्रदेशका नवनियुक्त मन्त्रीहरु भन्छन, पार्टी निर्णय अनुसार नै सरकारमा गएका हौं

७ वैशाख, काठमाडौं । लुम्विनी प्रदेशमा मुख्यमन्त्री विरुद्ध अविश्वासको प्रस्तावमा हस्तक्षर गरेको मसी सुक्न नपाउँदै उनकै मन्त्रीमण्डमा सहभागि हुन पुगेका जनता समाजबादी दलका सांसद एव नवनियुक्त मन्त्रीहरुले आफुहरु पार्टी निर्णय अनुसार नै सरकारमा गएको बताएका छन् ।

जनता समाजवादी पार्टी जसपा नेता तथा लुम्विनी प्रदेशका नवनियुक्त भौतिक पुर्वाधारमन्त्री सन्तोष कुमार पाण्डेले पार्टीकै निर्णय अनुसार आफुहरू सरकारमा गएको बताए ।  लुम्विनी प्रदेशको पार्टी संसदीय दलको दुईतिहाई बहुमतले नेता सहसराम यादव हटाएर आफुलाइ दलको नेता छानेको र दलकै निणर्यबाट आफुहरु सरकारमा सहभागी भएको उनको भनाइ छ  । उहाले आफुहरुको हस्ताक्षरलाई अविश्वास प्रस्तावका लागि दुरुपयोग गरेको समेत आरोप लगाए ।

जसपाले भने लुम्बिनी प्रदेशमा मन्त्री पदको सपथ लिने ४ नेतालाई निलम्बन गरी २४ घण्टे स्पष्टीकरण सोधेको छ । जसपाको लुम्बिनी प्रदेश समितिका अध्यक्ष अशोककुमार यादवले जारी गरेको विज्ञप्तिमा मन्त्री पदको सपथ लिएका विजयबहादुर यादव, सन्तोष पाण्डे, सुमन शर्मा रायमाझी र कल्पना पाण्डे लम्सालसँग स्पष्टीकरण माग गरिएको  छ । विज्ञप्तिमा सरकारबाट राजीनामा दिई चित्तबुझ्दो स्पष्टीकरण नदिएमा सांसद पद नरहने गरी कारबाहीका लागि कानुनी प्रक्रिया अवलम्बन गर्ने पनि उल्लेख छ।

सोमबार लुम्बिनी प्रदेश सरकारविरुद्ध नेपाली कांग्रेस, नेकपा माओवादी केन्द्र र जसपाका सांसदले अविश्वास प्रस्ताव दर्ता गरेका थिए । तर अविश्वास प्रस्ताव दर्ता गरेको केहीबेरमा जसपाका ४ जना नेताहरु मन्त्री भएका थिए ।