प्रभु लाइफकाे नेट्वर्थ गणनामा गाेलमाल

२४ वैशाख, काठमाडौं । जीवन बीमा कम्पनीहरुले नेट्वर्थ निकाल्दा चुक्ता पुँजी, जगेडा कोष र महाविपत्ति जगेडा पनि जोड्ने गरेका छन्  । तर, तेश्रो त्रैमासको रिपोर्ट निकाल्दा प्रभु लाइफ इन्स्योरेन्सले भने महाविपत्ति जगेडा नै नजोडेर नेट्वर्थ गणना गरेको भेटिएकाे छ ।

तेश्रो त्रैमासको प्रतिवेदन अनुसार प्रभु लाईफ इन्स्योरेन्सको चुक्ता पुँजी २ अर्ब, जगेडा कोषमा ३६ करोड ६० लाख र महाविपत्ति जगेडा कोषमा २ करोड ५७ लाख रहेको छ । यदि चुक्ता पुँजी, जगेडा कोष र महाविपत्ति जगेडालाई जोडेर प्रतिशेयर नेट्वर्थ निकाल्दा ११९ रुपैयाँ ५९ पैसा हुन आउँछ।

प्रभु लाईफले कसरी निकाल्यो रिपोर्ट ?

तेश्रो त्रैमासको विवरण निकाल्दा प्रभुले चुक्ता पुँजी, जगेडालाई मात्र जोडेर प्रतिशेयर नेट्वर्थ निकालेको देखिन्छ । कम्पनीको प्रकाशित प्रतिशेयर नेट्वर्थ ११८ रुपैयाँ ३० पैसा आउँछ ।

के भन्छ बीमा समिति ?

बीमा समितिका कार्यकारी निर्देशक एवं सुचना अधिकारी राजुरमण पौडेलका अनुसार हरेक बीमा कम्पनीले प्रकाशन गर्ने वित्तीय विवरणमा समितिले तोकेको मापदण्ड पुरा हुनु अनिवार्य छ । नेट्वर्थ गणनामा चुक्ता पुँजी, जगेडा कोष र महाविपत्ति कोषको रकम जोड्नु अनिवार्य हुन्छ ।

यदि कोही कसैले यो मापदण्ड बाहेक गरेर रिपोर्ट प्रकाशन गरेको भएमा त्यस कम्पनीको व्यालेलन्ससिट परिवर्तन गर्नु नै पर्छ । उनले भनेः- हाम्रो सम्बन्धित सेक्सनले रिर्पोट हेरेपछि कैफियत भेटिएमा रिपोर्ट सच्याउन निर्देशन दिन्छ । कुनै पनि बीमा कम्पनीले बीमा समितिको नियम र निर्देशन विपरित काम गर्न पाउँदैन । दायाँ बायाँ गर्ने कोही कसैलाई छुट छैन ।

के भन्छ प्रभु लाईफ ?

प्रभु लाईफका वित्त प्रमुखले प्रतिशेयर नेट्वर्थ गणनामा महाविपत्ति जगेडा जोडिन्छ कि जोडिदैन भन्ने हाम्रो प्रश्नमा हिसाब गरेर हेर्नुहोस् न थाहा पाइहाल्नु हुन्छ नि भन्ने जवाफ दिए । उनले भने, हामीले रिर्पोट निकालिसकेका छौं, हिसाब गरेर हेर्नुहोस् ।

हिसाब गर्दा त बीमा समितिको मापदण्ड अनुसार त मिलेको छैन नि ? भन्ने प्रश्नमा हिसाब धेरै फरक नपरेको बताए । बीमा समितिले नेटवर्थका लागि भनेर कुनै नियम ननिकालेको हुँदा महाविपत्ती जोड्न नपर्ने बताए । उनीहरु (समिति) ले नयाँनयाँ फर्मुला पठाएका हुन्छन् । सोही फरर्मुला अनुसार हामीले रिपोर्ट प्रकाशन गर्ने हो । एनएफआरएस अनुसार हामीले निकालेको नेटवर्थ जति छ, त्यही नै सही हो ।