साढे २ अर्ब बीमाशुल्क आर्जन गरेको सिटिजन्स लाईफ इन्स्योरेन्सको १ दशमलव २७ प्रतिशतले मुनाफा बढ्यो

२६ वैशाख, काठमाडौं । सिटिजन्स लाईफ इन्स्योरेन्स कम्पनी लिमिटेडले चालू आर्थिक वर्षको ९ महीनासम्म १४ करोड ५७ लाख ४८ हजार मुनाफा गरेको छ ।

यो मुनाफा गत वर्षको यसै अवधिको तुलनामा १ दशमलव २७ प्रतिशत बढी हो । गत वर्ष यस अवधिसम्म कम्पनीले १४ करोड ३९ लाख २३ हजार मुनाफा गरेको थियो ।

यस वर्ष कम्पनीले ५ प्रतिशत बढी खर्च गरेको छ । कम्पनीले २० करोड ५५ लाख १३ हजार आम्दानी गरेकोमा ५ करोड ९७ लाख ६५ हजार खर्च गरेको हो । गत वर्षभन्दा यस वर्ष कम्पनीको कुल बीमाशुल्क आर्जन भने ११० प्रतिशतले बढेको छ ।

गत वर्ष १ अर्ब १८ करोड ५३ लाख ११ हजार कुल बीमाशुल्क आर्जन गरेको कम्पनीले यस वर्ष २ अर्ब ४८ करोड ७४ लाख ९८ हजार यो शुल्क आर्जन गरेको हो । कुल दाबी भुक्तानी रकम भने यस वर्ष ४७७ प्रतिशत बढी भएको छ ।

गत वर्ष यस अवधिमा ७ करोड २२ लाख ५९ हजार कुल दाबी भुक्तानी गरेको कम्पनीले यस वर्ष ४१ करोड ७१ लाख २७ हजार दाबी भुक्तानी गरेको हो ।

हाल कम्पनीको चुक्तापूँजी १ अर्ब ७५ करोड रहेको छ । यस कम्पनीले सर्वसाधारणमा आईपीओ जारी गर्न बाँकी रहेको छ । जगेडा कोष रकम भने गत वर्षभन्दा यस वर्ष ६५ प्रतिशत बढेर ७६ करोड कायम भएको छ ।

जीवन बीमा कोष रकम १३८ प्रतिशत बढेर ३ अर्ब १ करोड ११ लाख २९ हजार कायम भएको छ । तेस्रो त्रैमाससम्म दिर्घकालिन लगानी ३ अर्ब ८३ करोड ९९ लाख २ हजार रहेको कम्पनीले बीमालेख धितोमा २३ करोड ५ लाख २५ हजार कर्जा प्रवाह गरेको छ ।