दमौली अस्पतालमा कोभिड संक्रमितको उपचार शुरु

२९ वैशाख,दमौली । दमौली अस्पतालले कोभिड संक्रमितको उपचार शुरु गरेको छ । अस्पतालले मङ्गलबारदेखि कोभिड संक्रमितलाई भर्ना गरेर उपचार शुरु गरेको हो ।

अस्पतालमा पाँच संक्रमितको उपचार भइरहेको अस्पतालका मेडिकल सुपरिटेन्डेन्ट डा. सुनिल पौडेलले जानकारी दिए । उनका अनुसार चार व्यास नगरपालिका र एक म्याग्देका संक्रमितको उपचार शुरु गरिएको छ । सबै संक्रमित निमोनियापीडित छन् । संक्रमितलाई अक्सिजन दिइएको छ ।

“सबै संक्रमितको फोक्सोमा निमोनिया देखिएको छ, उनीहरुलाई अक्सिजन र अत्यावश्यक औषधि दिइएको छ”, डा. पौडेलले भने । उनका अनुसार अस्पतालमा १६ संक्रमितलाई उपचार गर्न सक्ने गरी व्यवस्था मिलाइएको छ । अहिलेको अवस्थामा उक्त शय्या आजै भरिनेजस्तो देखिएको डा पौडेलले बताए । अस्पतालले जनरल वार्डलाई कोभिड कक्षमा रूपान्तरण गरेको थियो । उक्त ठाउँमा शय्या थप गर्ने प्रयास भइरहेको पनि अस्पतालले जनाएको छ । अस्पतालले सात आइसीयू र चारवटा भेन्टिलेटरसहितको शय्या यसअघि नै तयार गरिसकेको छ ।