भेरी अस्पतालले सार्वजनिक गर्यो घटनाको विवरण

१४ जेठ, काठमाडौं । भेरी अस्पतालमा भएको घटनाका विषयमा अस्पतालले सार्वजनिक जानकारी प्रकाशित गरेको छ । आफ्नो सामाजिक सञ्जाल फेसबुक मार्फत अस्पतालले घटनाको विवरण सार्वजनिक गरेको हो।

अस्पतालमा बिहीबार राति चिकित्सकमाथि आक्रमण भएको छ । उपचारका क्रममा एकजना संक्रमितको मृत्यु भएपछि मृतकका आफन्तले चिकित्सकमाथि आक्रमण गरेको अस्पतालले जनाएको छ ।

अस्पतालका अनुसार बिहीबार राति करिब ८ बजेको थियो होला । सिप्याप भेन्टिलेटरमा दाङका ५४ वर्षीय संक्रमित उपचाररत थिए । उनको अवस्था गम्भीर थियो । स्वास्थ्यमा सुधार आउन सकिरहेको थिएन चिकित्सकहरुले उनलाई बचाउन हरसम्भव प्रयास गरिरहेका थिए । अन्ततः उनको मृत्यु भयो ।

मृत्यु पछि मृतकका आफन्तले अस्पतालमा तोडफोड गर्दै चिकित्सकहरुमाथि आक्रमण गर्न थालेपछि ४ जना चिकित्सकले झ्यालबाट तल्लो तलामा हाम्फालेर ज्यान बचाएको बताएका छन् । आक्रमणबाट बच्न भागेर ट्वाइलेटसम्म पुगेका केही चिकित्सक तथा नर्सलाई भने उनीहरुले लखेटीलखेटी आक्रमण गरेको बताइएको छ ।