संक्रमित किशोरीमाथि बलात्कार प्रयास गर्ने इन्जिनियर पक्राउ

२२ जेठ, रोल्पा । रोल्पामा धारामा नुहाउँदै गरेकी कोरोना संक्रमित किशोरीमाथि बलात्कार प्रयास गर्ने इन्जिनियर पक्राउ परेका छन् । जिल्ला प्रहरी कार्यालय रोल्पाका अनुसार जिल्लाको रुन्टीगढी गाउँपालिकाको घटना हो ।

दाङको लमही घर भएका शेषमणी पौडेलले रुन्टीगढी गाउँपालिकाकी स्थानीय किशोरी माथि बलात्कार प्रयास गरेपछि पक्राउ गरिएको जिल्ला प्रहरी कार्यालय रोल्पाले जनाएको छ ।

पौडेल रुनटिगढी गाउँपालिकामा कार्यरत इन्जिनियर हुन् । उनले किशोरी घर नजिकैको धारामा नुहाउन गएको बेला वोतल भर्ने बहाना गरेर बलात्कारको प्रयास गरेको प्रहरीले बताएको छ।

जबरजस्ती करणी असफल भएपछि इन्जिनियर पौडेल भागेर गाउँपालिका कार्यलय पुगेका थिए । उता किशोरी भने घरमा गएर रोइकराई गरेपछि घटनाबारे थाहा भएको पीडित परिवारको भनाइ छ ।