सरकारको आँखा छलेर पूरानो नक्सा अंकित पुस्तक बिक्री गर्नेलाई कारबाही गरिने

२६ जेठ, काठमाडौं । नेपालको पुरानै नक्सा छापिएको पाठ्यपुस्तक जफत गर्न शिक्षामन्त्री कृष्णगोपाल श्रेष्ठले निर्देशन दिएका छन् । शिक्षा, विज्ञान तथा प्रविधि मन्त्रालयले पुरानो नक्सा अंकित पुस्तक बिक्री वितरण गरेका भेटिएमा पुस्तक जफतसँगै प्रकाशक र वितरकलाई कारबाही गर्न शिक्षामन्त्री श्रेष्ठले निर्देशन दिएका हुन् ।

पाठ्यक्रम विकास तथा मुल्याङ्‌कन परिषद्को‌ बुधबार सम्पन्न ८८औं बैठकमा मन्त्री श्रेष्ठले देशलाई आँच पुग्नेगरी पुरानो नक्सा उल्लेख गरी पुस्तक बिक्री गरेको पाइए तत्काल प्रहरी प्रशासन लगाएर कारबाही गरिने बताए ।

केही निजी प्रकाशकले नयाँ संस्करण उल्लेख गरी नेपालको पुरानो नक्सा छापेर पुस्तक बिक्री गरेको जानकारी पाएपछि मन्त्री श्रेष्ठले तत्काल त्यस्ता प्रकाशकलाई कारबाही गर्न दिएका छन् । साथै, मन्त्री श्रेष्ठले सरकारको आँखा छलेर पुरानो नक्सा उल्लेख गरी पुस्तक बिक्री गर्ने पुस्तक प्रकाशकमाथि तत्काल कारबाही गरिने बताएका छन् ।

उनका अनुसार प्रकाशक र वितरकलाई तत्काल स्पष्टीकरण सोध्ने, पुरानो नक्सा अंकित बजारमा बिक्री भएका पुस्तक जफत गर्ने र मन्त्रालयको निर्देशन अटेर गरे कानुन अनुसार अनुसार कारबाही गरिन्छ । अहिलेको नयाँ नेपालको नक्सामा लिम्पियाधुरा समेटिएको छ ।