पहिरोको कारण सिद्धार्थ राजमार्ग अवरुद्ध

३० जेठ,स्याङ्जा । शनिवार रातीदेखि परेको अविरल बर्षादले स्याङ्जाको भालुपहाडमा पहिरो खस्दा सिद्धार्थ राजमार्ग अवरुद्ध भएको छ । फेदिखोला गाँउपालिका २ स्थित भालुपहाडमा पहिरो गएपछि सिद्धार्थ राजमार्ग अन्तर्गत स्याङ्जा पोखरा सडकखण्ड अबरुद्ध भएको हो ।

गतबर्ष देखि बिना मापदण्ड भालुपहाडमा राजमार्ग फराकिलो बनाउन खनिएका कारण पहिरो गएको स्थानीयले बताएका छन् । जिल्ला प्रहरी कार्यालय स्याङ्जाका सुचना अधिकारी प्रहरी नायव उपरिक्षक राजेन्द्र अधिकारीका अनुसार राति २ बजे ठूलो पहिरो गएको बताए ।

पहिरो गएपछि राजमार्गमा चल्ने अत्यावश्यक सवारी साधन सडकमा नै अलपत्र परेका छन् । सडक खुलाउन पोखराबाट डोजर बोलाइएको जिल्ला प्रहरी कार्यालय स्याङ्जाका सुचना अधिकारी प्रहरी नायव उपरिक्षक अधिकारीले बताए ।

भालुपहाडमा नयाँबर्ष शुरु भएयता दुईपटक ठुलो पहिरो गइसकेको छ । अझै बर्षायाममा ठुलो समस्या हुने देखिएको बताइएको छ । अहिले प्रहरी र स्थानीयवासीको पहलमा सडक खुलाउने प्रयास भैरहेको बताइएको छ ।

बिहान ११ बजेसम्म सडक खुल्ने प्रहरीले बताएको छ । बिना मापदण्ड सडक चौडा बनाउने नाममा राजमार्गको विभिन्न स्थानमा सडक खनिएको कारण राजमार्गमा यात्रा गर्न निकै जोखिम हुन थालेको यातायात व्यवसायीहरु बताउछन् ।

आउने बर्षाद्मा भालुपहाडको पहिरो पाल्पाको सिद्धबाबा जस्तै बन्ने त होइन भन्ने चिन्तामा स्याजावासी रहेका छन् । शनिवार रातीदेखि परेको अबिरल बर्षाले भालुपहाड बाहेक अहिले सम्म कुनै बिपद्को अप्रिय घट्ना भने नभएको प्रहरीले जनाएको छ ।