आजदेखि भदौ मसान्तसम्म जथाभाबी सडक खन्न नपाइने

१ असार, काठमाडौं । आजदेखि भदौ मसान्तसम्म जथाभाबी सडक खन्न नपाइने भएको छ । बर्खामा सडक खन्ने प्रवृत्ति बढेसँगै आजदेखि भदौ मसान्तसम्म यसलाई रोक लगाइएको सडक विभागअन्तर्गतको सङ्घीय सडक सुपरीवेक्षण तथा अनुगमन कार्यालयले जनाएको हो ।

बर्खायाममा धारा, ढल, बिजुली र टेलिफोन प्रयोजनका लागि सडक खन्दा तत्काल मर्मतसम्भार गरी पुरानै अवस्थामा ल्याउन नसकिने भन्दै सडक खन्न रोक लगाइएको हो ।

नियम अटेर गर्दै कसैले सडक खनेको पाइए सार्वजनिक सडक ऐन २०३१ अनुसार कारबाही हुने पनि कार्यालयले जनाएको छ । अहिले सडक खन्दा तुरुन्तै कालोपत्र तथा मर्मत गर्न नसकिने हुँदा सडकको अवस्था थप बिग्रँदै जाने भएकाले खन्न रोक लगाइएको सडक विभागले जनाएको छ ।

विभागका अनुसार अहिले विस्तार भइरहेका सडकको कामलाई निरन्तरता दिन भने पाइन्छ । यस्तै, पहिल्यै स्वीकृति लिइसकेको मेलम्चीको पाइप बिछ्याउने र लिकेजको काम गर्न पनि पाइन्छ । तर, तर नयाँ सडक भने खन्न पाइँदैन । अत्यावश्यक नै परे सम्बन्धित निकायसँग अनुमति लिनुपर्दछ ।