चिनियाँ राजदूतको कुटनीतिक सक्रियता बढ्यो, एकैदिन तीन शीर्ष नेतासँग छलफल

१ साउन, काठमाडौं । नेपालस्थित चिनियाँ राजदूत होउ यान्छीले एकैदिन तीन वटा महत्वपूर्ण भेटघाट गरेकी छिन् । उनले प्रधानमन्त्री शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ र नेकपा एमालेका वरिष्ठ नेता माधवकुमार नेपाललाई छुट्टा–छुट्टै भेटघाट गरेकी हुन् ।

राजदूत यान्छी अपराह्न ४ बजे कोटेश्वरमा नेता नेपालसँग र प्रचण्डलाई बिहान साढे १० बजे निवास खुमलटार पुगेर भेट गरेकी थिइन् । बिहान प्रधानमन्त्री शेरबहादुर देउवालाई भेटे लगतै उनले प्रचण्डसँग शिष्टाचार भेट गरेकी हुन् । त्यसक्रममा उनले चीनले नेपाललाई थप १६ लाख डोज कोभिड खोप दिने निर्णय गरेको समेत जानकरी गराएकी थिइन् ।

प्रचण्ड र राजदूत यान्छीले करिब एक घण्टा भेटवार्ता गरेको प्रचण्ड निकट एक नेताले बताए । निवर्तमान प्रधानमन्त्री केपी शर्मा ओलीले राजीनामा दिएपछि पाँच दलीय गठबन्धनबाट देउवा प्रधानमन्त्री भएपछि प्रचण्डलाई राजदूत यान्छीले भेटेकी हुन ।

प्रचण्डलाई भेटेलगतै राजदूत यान्छी अपराह्न् ४ बजे एमाले वरिष्ठ नेता नेपाललाई भेट्न कोटेश्वर पुगेकी छिन् । देउवा–प्रचण्डलाई भेटेलगत्तै चिनियाँ राजदूतले नेपाललाई भेट्नुलाई अर्थपूर्ण रुपमा हेरिएको छ ।

अपरान्ह ४ बजे एमाले वरिष्ठ नेता माधवकुमार नेपालसँग भेटघाट गर्दै एमाले विवादको विषयमा समेत चासो राखेकी थिइन । नेता नेपालसँग चिनियाँ राजदूतले नेपाल र चीन बीचको सम्बन्ध र नेपालको राजनीतिक अवस्था र पार्टीभित्र उत्पन्न भएको विवादबारे छलफल गरेकी हुन् ।