सवारी लाइसेन्सको परीक्षा खोल्ने तयारी गर्दै यातायाता व्यवस्था विभाग

१८ साउन, काठमाडौं । यतिबेला बन्द गरिएको सवारीचालक अनुमतिपत्र (लाइसेन्स)को परिक्षा यातायात व्यवस्था विभागले साउनदेखि लिने तयारी गरेको छ । निषेधाज्ञा खुलेर अवस्था सामान्य भएको भन्दै विभागले साउन अन्तिम साता ट्रायलका लागि आवेदन खुलाउने तयारी गरेको हो ।

यातायात व्यवस्था विभागले दशैं अघि सवारीचालक अनुमतिपत्र (लाइसेन्स)को परीक्षा खोल्न नसकिने बताएको थियो ।

विभागका महानिर्देशक नमराज घिमिरेले साउन अन्तिम साता सूचना सार्वजनिक गरी ट्रायल परीक्षा पुनः सञ्चालन गरिने जानकारी दिए ।

विभागले निषेधाज्ञा शुरू भएपछि गत वैशाख १६ गतेदेखि ट्रायल परीक्षाको आवेदन बन्द गरेको थियो । यातायात कार्यालयले निषेधाज्ञा खुकुलो नभएकाले तत्काल ट्रायल शुरू गर्न नसकिने बताएका थिए ।

निषेधाज्ञाअघि नै ट्रायल परीक्षाका लागि आवेदन दिएकामध्ये ४ लाखले परीक्षा दिन बाँकी छ । अहिले निषेधाज्ञा पूर्णरूपमा नहटे पनि अन्य परीक्षा सञ्चालन हुन थालेकाले सवारीसाधनको ट्रायल खुलाउने तयारी गरिएको विभागका महानिर्देशक घिमिरेले बताए ।