आज सरकारको साँझा नीति तथा कार्यक्रम आउने, बिहीवारसम्म मन्त्रिमण्डल विस्तार हुने

१९ साउन, काठमाडौं । केपी ओलीलाई विस्थापित गरि खडा भएको शेरबहादुर देउवा नेतृत्वको पाँच दलीय गठबन्धन सरकारले बिहीवारसम्म पूर्ण आकारको मन्त्रिमण्डल बनाउने भएको छ ।

हिजो बसेको सत्ता गठबन्धन दलको बैठकले मन्त्रिमण्डललाई पूर्णता दिने आन्तरिक सहमतिसहित आज पाँच दलको साँझा न्यूनतम कार्यक्रम सार्वजनिक गरिने भएको हो । सत्ता गठबन्धनमा सहभागी जनता समाजवादी पार्टी (जसपा) को फेस सेभिङका लागि संविधान संशोधनको प्रतिबद्धतासमेत सरकारको न्यूनतम साँझा कार्यक्रममा समावेश हुने भएको छ ।

वर्तमान मन्त्रिमण्डल विस्तारमा ढिलाई हुँदै गर्दा यसको चौतर्फी आलोचना शुरु भैसकेको छ । यसो हुनुको एउटा मूलकारण माधव नेपाल समूहलाई पर्खिएको भनिएपनि यो बाहिर देखाउने कारण मात्र हो ।

भित्री मनसुवा भनेको सबै सरकारी नियुक्तिसम्बन्धी भागबन्डा अनि नेपाली कांग्रेस पार्टीको महाधिवेशनपछि कांग्रेसले गृहमन्त्री माओवादीलाई दिएर अर्थमन्त्री लिने र आवश्यक परे आलोपालो गर्ने जस्ता गोप्य र भित्री सहमति नै भएको दावी एक कांग्रेस नेताले गरेका छन् ।

आज संयुक्त सरकारको साँझा न्यूनतम कार्यक्रम गठबन्धन कार्यदलले तयार पारेको छ । त्यसलाई आज सार्वजनिक गरेपछि बिहिवारसम्म विस्तारित मन्त्रीमण्डल आउने भनिएको छ ।