नवलपुरमा बलात्कारका घटनामा बृद्धि, अपराधिक मानसिकता बढ्दै

२४ साउन, नवलपुर । नवलपुर जिल्लामा बलात्कारका घटना दोब्बरले बढेको छ । आर्थिक वर्ष २०७६/०७७ को तुलनामा गत आर्थिक वर्षमा घटना झण्डै दोब्बरले बढेको हो । यसले जिल्लाका मानिसहरुमा अपराधिक मानसिकता बढ्दै गएको पुष्टि गरेको छ ।

आर्थिक वर्ष २०७६/०७७ मा जबरजस्ती करणी शीर्षकमा १६ वटा मात्रै मुद्दा दर्ता भएकोमा आर्थिक वर्ष २०७७/०७८ मा ९४ प्रतिशत बढेर ३१ वटा मुद्दा दर्ता भएको छ । झण्डै दोब्बरले घटना वृद्धि हुनु दुखद रहेको र सचेतना बढेकाले उजुरी गर्ने बढेर पनि मुद्दा दर्ता बढ्दो रहेको बताइएको छ ।

जिल्ला प्रहरी कार्यालय नवलपुरका प्रमुख प्रहरी उपरीक्षक प्रकाश मल्लका अनुसार कानून प्रतिको भरोसामा वृद्धि, अपराध लुकाउन हुन्न भन्ने धारणाको विकास, अभियुक्तको मानसिक चिन्तन, सामाजिक संजाल तथा अश्लिल भिडियोको प्रभाव, देखासिकी र साथी संगतीको प्रभाव, विवाह गर्ने, पैसा दिने, रोजगार लगाइदिन्छु भन्ने प्रलोभनमा पर्नु र चिनेजानेकाबाट यस्ता घटनाहरु भइरहेको छ ।

आर्थिक वर्ष २०७६/०७७ मा दर्ता १६ वटै मुद्दाको फछ्र्योट भइसकेको छ । गत आर्थिक वर्ष २०७७/०७८ मा दर्ता भएको ३१ मुद्दा पनि पर्छौट भइसकेको मल्ले जानकारी दिए ।

जिल्लामा जवरजस्ती करणी प्रयासका घटनामा भने कमी आएको छ । आर्थिक वर्ष २०७५/०७६ मा ८ वटा मुद्दा दर्ता भएकोमा गत आर्थिक वर्ष २०७७/०७८ मा भने जम्मा २ वटा मात्रै मुद्दा दर्ता भएको छ । ७५ प्रतिशतले उक्त घटनामा कमी आएको छ ।

प्राय यस्ता घटनाहरुमा महिलाहरुलाई निशाना बनाउने, एकान्त स्थान वा बन्द कोठाभित्र, सकेसम्म ललाइफकाई गर्ने नसके जवरजस्ती गर्ने तथा आफन्त र नजिकका मानिसहरुकाबाट यस्तो अपराधको प्रयास हुने गरेको अनुसन्धाका क्रममा खुलेको छ ।