प्रधानसेनापति पूर्णचन्द्र थापा आजबाट बिदामा बस्ने

२५ साउन, काठमाडौं । प्रधानसेनापति पूर्णचन्द्र थापा सोमबारबाट बिदामा बस्ने भएका छन्। भदौ २४ गते अवकाश पाउन लागेका थापा नेपाली सेनाको परम्पराअनुसार अवकास हुनुभन्दा एक महिना अघि नै बिदामा बस्न लागेका हुन्।

थापा बिदामा बस्ने भएपछि कायममुकायम प्रधानसेनापतिको जिम्मा प्रभुराम शर्माले पाउनेछन्। सरकारको सिफारिसमा राष्ट्रपतिले बलाधिकृत रथी प्रभुराम शर्मा कायममुकायम प्रधानसेनापतिको जिम्मेवारीमा नियुक्त गरिसकेकी छन्।

उनले आगामी २४ भदौबाट अनिवार्य अवकाश पाउँदै छन् । अवकाश हुनुभन्दा महिना दिनअघि नै सेनामा घर बिदामा बस्ने चलन छ । थापा २४ भदौ ०७५ मा प्रधानसेनापति नियुक्त भएका थिए । प्रधानसेनापतिको तीनवर्षे कार्यकाल पूरा गरी अनिवार्य अवकाशमा जाने थापा ०३६ मा सैनिक संगठन प्रवेश गरेका थिए ।

१२ साउनमा बसेको मन्त्रिपरिषद् बैठकले शर्मालाई कायममुकायम प्रधानसेनापतिको जिम्मेवारी दिने निर्णय गरेको थियो । सोही सिफारिसलाई राष्ट्रपति भण्डारीले सदर गर्ने निर्णय गरेकी हुन् । शर्मा हाल सेनाको बलाधिकृत छन् । सैनिक ऐन, २०६३ को दफा ८ को उपदफा ३ अनुसार शर्माले सेनाको भावी प्रधानसेनापतिका रूपमा अघि सार्दै कायममुकायमको भूमिकामा सिफारिस गरेको थियो ।