न्यायाधीश भट्टराईको इजलासमा विशेष अधिवेशन विरूद्धको रिट

२७ साउन, काठमाडौं । लुम्बिनी प्रदेशसभाको विशेष अधिवेशन आह्वान गर्ने निर्णयविरूद्ध पेश भएको रिट न्यायाधीश आनन्दमोहन भट्टराईको इजलासमा परेको छ।

लुम्बिनीको विशेष अधिवेशन रोक्न माग गर्दै सर्वोच्च अदालतमा रिट दायर भएको हाे । सर्वोच्चका अनुसार उक्त रिट पेशी सूचीको ८ औँ नम्बरमा परेको छ।

लुम्बिनी प्रदेश प्रमुख कार्यालयले आजका लागि प्रदेश सभाको विशेष अधिवेशन आह्वान गरेको थियो। उक्त आह्वान संविधान विपरित भएको भन्दै एमालेका प्रदेश सभा सदस्य लिला गिरीले रिट दायर गरेका थिए।

प्रदेश प्रमुखको कार्यालयका सचिव चिरञ्जीवी पौडेलले विज्ञप्ति जारी गर्दै प्रदेश सभाका सदस्यहरूले नेपालको संविधानको धारा १८३ को उपधारा ३ बमोजिम प्रदेशसभाको अधिवेशन बोलाउन लिखित अनुरोध भएअनुसार अधिवेशन आह्वान गरिएको उल्लेख गरेका छन्।

जसअनुसार लुम्बिनी प्रदेश सभा बैठक बुधवार दिउँसो १ बजेलाई बोलाइएको छ। उक्त बैठकमा मुख्यमन्त्री शंकर पोखरेल विरुद्धको अविश्वास प्रस्तावमाथि छलफल हुनेछ।