सरकारको प्राविधिक टोली सर्वेक्षण गर्न सिन्धुपाल्चोकमा

२९ साउन, काठमाडौं । राष्ट्रिय विपत् जोखिम न्यूनीकरण तथा व्यवस्थापन प्राधिकरणका कार्यकारी प्रमुख अनिल पोखरेलको नेतृत्वको टोली आज बाढी पहिरोले तहसनहस पारेको क्षेत्र सिन्धुपाल्चोक पुगेको छ ।

बाढी र पहिरोले बगाएका स्थानमा बेलिब्रिज वा यान्त्रिक पुल राख्ने स्थानको सर्वेक्षण गर्न सरकारको प्राविधिक टोली आज स्थलमार्ग हुँदै सिन्धुपाल्चोक पुगेको हो ।

प्राविधिक टोलीमा नेपाली सेना, सडक विभाग, राष्ट्रिय विपत् जोखिम न्यूनीकरण तथा व्यवस्थापन प्राधिकरण र सस्पेन्सन ब्रिज डिभिजन कार्यालयका प्रतिनिधिहरु सहभागी छन् ।

प्राधिकरणका कार्यकारी प्रमुख पोखरेलले मेलम्ची नगरपालिका, हेलम्बु गाउँपालिका, पाँचपोखरी थाङ्पाल गाउँपालिकाका जनप्रतिनिधिहरुसँग समन्वय गरेर बेलिब्रिज वा यान्त्रिक पुल राख्न सकिने ठाउँको सर्वेक्षण गर्ने जनाइएको छ ।