नेपाली बजारमा सुन तोलामा १८ सयले बढ्यो

४ भदौं, काठमाडौं । नेपाली बजारमा सुनचाँदीको भाउ एक सातामा तोलामा १८ सय रुपैंयाले बढेको छ । गत साता तोलामा ९० हजार रुपैयाँ तल झरेको सुनको मूल्य यो साता अधिकतम ९१ हजार दुई सय रुपैयाँ पुगेको हो ।

नेपाल सुनचाँदी व्यवसायी महासंघका अनुसार गत शुक्रबार ८९ हजार ७ सय रुपैयाँमा छापावाल सुनको कारोबार भएको थियो । आज बिहीबारको तुलनामा तोलामा ४ सयले बढेर छापावाल सुनको मूल्य ९१ हजार २ सय रुपैयाँ पुगेको छ । यस्तै तेजावी सुनको भाउ ९० हजार ७ सय रुपैयाँ तोकिएको छ ।

चाँदीको मूल्य पनि तोलामा १५ रुपैयाँले बढेको छ । बिहीबार ११ सय ८० रुपैयाँ तोलामा कारोबार भएको चाँदीको मूल्य शुक्रबार ११ सय ९५ रुपैयाँ तोकिएको महासंघले जनाएकाे छ । महासंघका अनुसार सातामा चाँदीको मूल्य भने तोलामा २० रुपैयाँले वृद्धि देखिएकाे छ ।