रौतहटका एसपी शाह प्रहरी प्रधान कार्यालयमा तानिए

८ भदौ, काठमाडौं । रौतहटका एसपी सिद्धिविक्रम शाहलाई प्रहरी प्रधान कार्यालयमा तानिएको छ । पत्रकारलाई लागुऔषध मुद्दामा फसाइएको घटना बाहिरिएपछि रौतहटका एसपी शाहलाई प्रधान कार्यालयको प्रशासन शाखामा तानिएको हो ।

नियमविपरित घुमुवा राखेको र पत्रकारलाई लागुऔषध राखेर फसाउन खोजेपछि उनीमाथि छानविन शुरु भएको थियो । प्रदेश २ प्रहरी प्रमुख डीआईजी उमेश रञ्जीतकारका अनुसार प्रधान कार्यालयले एसपी शाहलाई प्रशासन शाखामा हाजिर हुन भनेको छ ।

प्रधान कार्यालयले शाहको स्थानमा नयाँ एसपी पठाउँदैछ । यस घटनाको छानविन तथा अनुसन्धान प्रधान कार्यालयले गरिरहेको उनले बताए ।