प्रहरीले पत्रकार फसाउनका लागि कहाँबाट ल्यायो औषधिजन्य लागुऔषध ? 

१० भदौ, काठमाडौं । रौतहटका एसपी सिद्धिविक्रम शाह र डीएसपी नारायणप्रसाद चिमरिया नै लागुऔषध तस्करीमा लागेको आशंका गरिएको छ । मोटरसाइकलमा लागुऔषध राखिदिएर पत्रकारलाई सुनियोजित रूपमा फसाउन उनका घुमुवालाई लागुऔषधको व्यवस्था एसपी शाह र चिमरियाले जुटाइदिएको बताइएपछि उनी तस्करीमा लागेको शंका गरिएको हो ।

‘एसपीर डीएसपी कै निर्दैशनमा लागुऔषध राखिएको पाइएको छ, अहिले त्यो औषधिजन्य लागुऔषध कहाँबाट आयो भन्ने जानकारी छैन, प्रहरीकै व्यवस्थापनमा आएको हो भन्ने हाम्रो आशंका हो, यसमा एसपी र डीएसपी कै हात देखिन्छ’, प्रहरी प्रधान कार्यालयले गठन गरेको छानविन समितिका एक सदस्यले भने ।

रौतहटका दुई प्रहरीविरुद्ध प्रहरी प्रधान कार्यालयले लागुऔषध कारोबार मुद्दा दर्ता गर्ने तयारी गरेको छ । तर, फसाउन निर्देशन दिने जिल्ला प्रहरी प्रमुख एसपी शाहलाई भने निलम्बन नै नगरी उन्मुक्ति दिन खोजिएको छ । अझ डीएसपी चिमरियाको बारेमा त कुरै उठान भएको छैन् । एसपी शाह र चिमरियाविरुद्ध अहिलेसम्म कुनै कारबाही अघि बढाइएको छैन । जबकी पीडित पत्रकार मोहम्मद मोजिबुल्लाहले डीएसपी चिमरियाले अपशब्द प्रयोग गर्दै गाली गरेको बताएका छन् ।

छानविन समितिको प्रतिवेदनपछि मात्रै उनीहरूलाई कारबाही गर्ने–नगर्ने टुंगो लाग्ने नेपाल प्रहरीका प्रवक्ता एसएसपी वसन्तबहादुर कुँवरले बताएका छन् । तर लागुऔषध कहाँबाट आयो र एसपीको निर्दैशन मान्ने सई र जवानलाई मात्रै फसाउन खोजिएको छ । ‘उनीहरुले एसपी र डीएसपीको निर्देशन मानेका हुन्, उनीहरुलाई लागुऔषध पनि डीएसपीले नै व्यवस्थापन गरेको देखिन्छ’, स्रोतले भन्यो ।

पत्रकार मोहम्मद मोजिबुल्लाहको मोटरसाइकलमा लागुऔषध राख्ने असई उदय यादव र जवान मनोज साहलाई भने निलम्बन गरिएको छ  ।जिल्ला प्रहरी कार्यालय रौतहटबाटै उनीहरूविरुद्ध मुद्दा चलाइनेछ । गत ३२ साउनमा पत्रकार मोजिबुल्लाहको मोटरसाइकलमा लागुऔषध राखेर पक्राउ गरिएको थियो । प्रहरीले नै लागुऔषध राखेको सीसीटिभी फुटेजबाट पुष्टि भएपछि मंगलबार मात्रै उनी रिहा भएका छन ।

जिल्लास्थित पत्रकारहरूले एसपी शाह र डीएसपी चिमरियाकै योजनामा मोजिबुल्लाहलाई फसाउन खोजिएको भन्दै विरोध जनाएका छन ।नेपाल पत्रकार महासंघले पनि एसपी शाह र डीएसपी चिमरियालाई निलम्बन गरेर अनुसन्धान गरिनुपर्ने माग गरेको छ । ‘घटनामा मुछिएका दुई प्रहरी कर्मचारी निलम्बनमा छन् । उनीहरूविरुद्ध अब के गर्ने भन्ने विषयमा कानुनी सल्लाह हुँदैछ । एसपी र डीएसपीको सन्दर्भमा भने तत्कालका लागि कारबाही अघि बढाइएको छैन । छानविन समिति गठन भएको छ । समितिले दिएको प्रतिवेदनका आधारमा कसुरदार देखिए कसुरको मात्राअनुसार कारबाही हुनेछ,’ उनले भने ।

प्रहरी महानीरिक्षकको सचिवालयका एसएसपी कृष्णकुमार महतको नेतृत्वमा चार सदस्यीय छानविन समिति बनाइएको छ । विवादित पत्रकार सञ्जय सहनीसँग पत्रकार मोजिबुल्लाह पक्राउ गरिएको विषयमा भएको टेलिफोन संवाद सार्वजनिक भएपछि जिप्रका रौतहट प्रमुख एसपी शाहको संलग्नता खुलेको थियो । भने हिजो मात्रै पत्रकार मोजिबुल्लाहले एक अनलाइनमा दिएको बयान हेर्दा डीएसपी चिमरियाको पनि संग्नता देखिएको छ । नेपाल पत्रकार महासंघका अध्यक्ष विपुल पोखरेलले तल्लो तहका प्रहरीलाई कारबाही गर्ने, तर निर्देशन दिने एसपी र डीएसपीलाई उन्मुक्ति दिन खोज्ने प्रहरीको गतिविधि खेदजनक रहेको बताएका छन् ।

‘पत्रकारलाई सुनियोजित ढंगले फसाउन खोजिएको छ । यही शैली हो भने त प्रहरीले जसलाई मन लाग्यो त्यसलाई फसाउने देखियो । यति गम्भीर घटना एसपी र डीएसपीको निर्देशनबिना हुनै सक्दैन । घटनामा संलग्न तल्लो तहका प्रहरी कर्मचारीलाई मात्रै निलम्बन गरी छानविन गरिएको छ । तर, निर्देशन दिने एसपी र डीएसपीलाई उन्मुक्ति दिन खोजिएको छ । यसमा हाम्रो आपत्ति छ । एसपी र डीएसपीलाई पनि निलम्बन गरी निष्पक्ष अनुसन्धान हुनुपर्ने हाम्रो माग छ,’ उनले भने ।

पत्रकार महासंघले मोजिबुल्लाहलाई फसाउन प्रहरीलाई सघाउने नेपाल पत्रकार महासंघ जिल्ला समिति रौतहटका सहसचिव सञ्जय सहनीलाई निलम्बन गरेको छ । मकवानपुरस्थित दामनमा भएको केन्द्रीय समिति बैठकले सहनीलाई निलम्बन गर्ने निर्णय गरेको हो । सो घट्नाबारे बुझ्न महासंघका अध्यक्ष र महासचिवसहित रौतहट जाने भएका छन् ।