गरिमा विकास बैंकको तीज अफर, टिकटक बनाउनेलाई नौ हजार उपहार

१० भदौ, काठमाडौं । गरिमा विकास बैंकले ‘गरिमा तीजको लहर’ टिकटक प्रतियोगिता आयोजना गर्ने भएको छ । नेपाली नारीहरुको महान चाड हरितालिका तीज नजिकिदै गईरहेको अवसर पारी सो प्रतियोगिता गर्न लागेको बैंकले जनाएको हाे ।

बैंकले एक विज्ञप्ति जारी गर्दै भनेको छ, “विश्वमा फैलिरहेको महामारी कोरोना भाइरसले गर्दा गत वर्षमा जस्तै भौतिक दुरी कायम राखी तीज मनाउने अवस्था हाललाई सम्भव नभएकाले भौतिक उपस्थितिबिना प्रविधिमैत्री तीजलाई प्रोत्साहन गर्न हामीले सम्पुर्ण नेपाली दिदीबहिनीहरुको लागि ‘गरिमा तीजको लहर’ टिकटक प्रतियोगिता आयोजना गर्न गईरहेका छौंं । यस टिकटक प्रतियोगितामा नेपाल भित्र रहनुहुने सबै नेपाली दिदीबहिनीहरुले भाग लिन सक्नुहुनेछ ।”

प्रतियोगितामा प्रतियोगीहरुले भिडियो बनाउनु हुँदा तीजको मर्मलाई ख्यालमा राखी यस पर्वलाई सकारात्मक तरिकाले व्याख्या गर्ने कुनै पनि गीत अथवा कन्सेप्टमा टिकटक भिडियो बनाउनुपर्ने छ । पर्वको मर्म विपरीत बनेको वा उत्श्रृङ्खल तवरले बनेका भिडियोहरुलाई विजेताको रुपमा छनोट नगरिने जनाइएको छ ।

प्रतियोगिताको विजेताले रु ९,००० उप–विजेताले रु ६,००० र तेस्रो हुनेले रु ३,००० जित्ने छन् । एउटा अत्याधिक राम्रो कन्सेप्टमा बनेको भिडियोले रु २,००० जित्ने छ । विजेताको घोषणा भिडियोमा आउने लाईकको आधारमा हुने जनाइएको छ । बेस्ट कन्सेप्ट भने अत्याधिक राम्रो कन्सेप्टमा बनेको भिडियोको आधारमा हुनेछ ।

टिकटक प्रतियोगिताको विस्तृत जानकारीहरु साथै शर्तहरुलाई बैंकको फेसबुक र बेबसाईटमा राखेको छ । ईच्छुक महिला टिकटकरहरुले मिती : २०७८–०५–१० गते देखि २०७८–०५–२४ गतेसम्म टिकटक भिडियोको क्यापसनमा #GarimaTeejkolahar र #Garimabikasbank  ह्यासट्याग प्रयोग गरि टिकटक भिडियो बनाउन सक्ने बैंकले जनाएको छ ।