सत्ता गठबन्धनको बैठक जारी मन्त्रीको नाम आजै टुंग्याउने तयारी

१४ भदौ, काठमाडौं । मन्त्रालयको भागबन्डा टुंगो लगाउन सत्ता गठबन्धनको बैठक बसिरहेको छ । प्रधानमन्त्रीको सरकारी निवास बालुवाटारमा सुरु बैठकमा जनता समाजवादी पार्टी (जसपा) बाट अध्यक्ष उपेन्द्र यादव र संघीय परिषद अध्यक्ष डा.बाबुराम भट्टराई, नेकपा (माओवादी केन्द्र)का अध्यक्ष पुष्पकमल दाहाल‘प्रचण्ड’, नेकपा (एकीकृत समाजवादी) पार्टीका अध्यक्ष माधवकुमार नेपाल छन् ।

आइतबार बिहान र साँझ दुईपटक बैठक बसेपनि मन्त्रालय भागबन्डाका विषयमा सहमति नजुटेपछि अहिले पुनः गठबन्धनका नेताहको बैठक बसेको हो ।

प्रधानमन्त्रीका प्रमुख स्वकीय सचिव भानु देउवाले भने समसामयिक राजनीतिक विषयमा छलफल भइरहेको बताएका छन् । गठबन्धनका दलबीच कुन दलले कति मन्त्रालय लिने भन्नेमा सहमति भएपछि आजै सम्बन्धित दलले मन्त्री बन्नेहरुको नाम दिने र मन्त्रिमण्डल विस्तार गर्ने तयारी छ ।

एकीकृत समाजवादीले आफ्नो मन्त्रीहरुको टुंगो लगाउने जिम्मा अध्यक्ष नेपाललाई आइताबारै दिइसकेको छ । यस्तै, जसपाले आजै बैठक बसेर नाम टुंगो लगाउने स्रोतले जनाएको छ । सत्तामा सहभागी भएको नेकपा माओवादी केन्द्र र सत्तामा सहभागी हुने निर्णय गरेको माधव नेपाल नेतृत्वको नेकपा (एकीकृत समाजवादी) मा मन्त्रिपरिषदमा जाने नेताहरुको नाम टुग्याउन लागिरहेका छन् ।

माओवादीले मन्त्रीमा जाने नेताहरुको नाम टुंग्याउन अध्यक्ष प्रचण्डलाई जिम्मा दिएको छ । प्रचण्डले आफू निकटका नेताहरुलाई सरकारमा पठाउने तयारी गरेका छन् ।