माधव नेपालसहित १४ सांसदको पद जोगाउने सभामुखको निर्णय

१४ भदौ, काठमाडौं । माधव नेपालसहितका १४ सांसदलाई कारवाही नहुने भएको छ । सभामुख अग्नि सापकोटाले नेकपा एमालेले १४ सांसदलाई कारबाहीका लागि गरेको सिफारिस कार्यान्वयन नगर्ने भएपछि उनीहरुको सांसद पद जोगिएको हो । निर्वाचन आयोगले नयाँ दल दर्ता भएको सूचना पठाएकाले सांसदलाई कारबाही नगर्ने निर्णय सभामुख सापकोटाले गरेका हुन ।

प्रतिनिधिसभाका सचिव गोपालनाथ योगीका अनुसार निर्वाचन आयोगले नेकपा एकीकृत समाजवादी दर्ता भएको पत्र भदौ ११ गते संसद सचिवालयलाई प्राप्त भएपछि सो निर्णय गरिएको हो । । ‘एमालेले कारबाही गर्न भनेर पत्र पठाएको थियो । अब कानून अनुसार अर्को दल दर्ता भइसकेको अवस्थामा अगाडि बढ्ने अवस्था नरहेको भनेर सभामुखले निर्णय गर्नु भएको छ’, योगीले भने ।

नेकपा एमालेले प्रधानमन्त्री केपी शर्मा ओलीले विश्वासको मत मागेपछि अनुपस्थित भएका १४ सांसदलाई ह्विप उल्लघंन गरेको भन्दै कारबाही सिफारिस गरेको थियो । एमाले सांसदहरुले तत्काल सूचना टाँस गर्न सभामुखको कार्यकक्षमा पुगेर धर्ना समेत दिएका थिए । प्रतिनिधिसभा नियमावली अनुसार सभामुखले कारवाहीको सूचना दलबाट प्राप्त भएको १५ दिनभित्र टाँस गर्नुपर्ने छ ।

तर सभामुख सापकोटाले १३ दिनसम्म सूचना प्रकाशित गरेका थिएनन् । उनले १३ औँ दिनमा नयाँ दल दर्ता भएको स्थितिमा कारबाहीको सूचना टाँस नगर्ने निर्णय लिएको संसद सचिवालयले जनाएको हो ।

प्रमुख प्रतिपक्षी दल एमालेले भने यो विषयमा कानुनी र सैद्धान्तिक रुपमा प्रतिवाद गर्ने निर्णय गरिसकेको छ । भदौ १० गते बसेको केन्द्रीय कमिटी बैठकपछि एमालले सो निर्णय गरेको हो । एमाले माधव नेपालसहितका १४ सांसदलाई ह्वीप उल्लंघन गरेको आरोपमा कारवाहीको माग गरेको थियो ।