एमालेभित्र सहमति कार्यान्वयनमा समस्या, दोस्रो धारका नेताहरु सशंकित

२१ भदौ, काठमाडौं । एमाले अध्यक्ष केपी ओलीले माधव नेपाल समूहमा रहेका दोस्रो र तेस्रो धारका नेता–कार्यकर्तालाई यथावत राख्न गरेको दश बुँदे सहमति कार्यान्वयनमा समस्या देखिएपछि दोस्रो तथा तेस्रो धारका नेताहरु अलमलमा परेका छन् ।

एमालेमै बसेका तेस्रो धारका दोस्रो पुस्ताका नेताहरुको राजनीतिक अडान र उनीहरुले भन्दै आएको पार्टी एकतामाथि प्रश्न उठाउँदै दश बुँदे कार्यान्वयनमा अलमल भए पार्टी रोज्ने आफ्नो अधिकार कायमै रहेको बताउन थालेका छन् ।

पार्टी विभाजनमा कतै नखुलेका कार्यकर्ता तान्ने दुवै पक्षको कसरत जारी रहेकै बेला जेठ २ अघिको एमाले पार्टी संरचनामा फर्काउने भनिएको दश बुँदे कार्यान्वयनप्रति अध्यक्ष ओली पछि हटेको आशंका गर्न थालिएको छ । यसले दोस्रो पुस्ताका तेस्रो धारका नेताहरु अलमलमा परेका हुन् ।

एमालेमा लामो समय माधव नेपालसँग रहेका तर पार्टी विभाजनका बेला नेपाललाई छाडेर एमालेमै बसेका नेताहरुले जेठ २ अनुसार १० बुँदे सहमति कार्यान्वयनको विषय उठान गरिरहेका छन् । तर, यही बेला पीपीएलको एक पक्षीय भेला र बनेपामा महासचिव ईश्वर पोखरेलले जेठ २ मा अब एमाले फर्कन नसक्ने फैसला सुनाएपछि एमालेमा १० बुँदे कार्यान्वयनबारे विभिन्न प्रश्न उठ्न थाले लगत्तै दोस्रो तेस्रो धारका नेताहरु सशंकित बनेका हुन् । ओलीसँग उनीहरुले हुबहु सहमति कार्यान्वयन हुने सहमति गरेका थिए ।

‘सहमति कार्यान्वयन गर्ने विषयमा ओली नबोलेपनि ओली पक्षको व्यवहार हेर्दा इमान्दार देखिएनन् । पेलेरै जानेजस्तो नीति देखियो, यसले हामीलाई झस्काएको छ हामी दोधारमै छौं,’ दोस्रो तहका एक नेताले भने । उनका अनुसार आउँदो केन्द्रीय कमिटी बैठकबाट सो कार्यान्वयन हुने र जिम्मेवारी समेत बाँडफाँड हुने भएकाले उनीहरुले आउँदो केन्द्रीय कमिटी बैठक पर्खिरहेका छन् । यो विषयमा दोस्रो तहका नेताहरु सुरेन्द्र पाण्डे, भीम रावल, घनश्याम भूषाल लगायतका नेताहरुले छलफल पनि गरेका छन् । तर ओलीले कार्यविभाजन गर्न बाँकी नै रहेकाले उचित जिम्मेवारी दिने बताएका छन् ।

अब नेकपा एमाले २०७५ जेठ २ को अवस्थामा जस्ताको तस्तै आउँदैन भनेर पटक–पटक दोहोर्याएका महासचि ईश्वर पोखरेलले हिजोको एमाले अहिले नभएको भन्दै विकसित एमाले बनिसकेको बताए । ‘हिजोको एमालेमात्रै होइन, यो विकसित एमाले हो । एकीकरणलाई प्रतिविम्वित गर्ने एमाले हो । अहिले हामीले सातै प्रदेशमा भनेका छौं, जहाँजहाँ मिलाउनुपर्ने हो, मिलाउनुस् । एउटै कुरा पार्टीको पक्षमा आउनेलाई जिम्मेवारी दिने, तर केही साथीहरुले २०७५ साल जेठ २ गते जस्ताको तस्तै भन्नुहुन्छ, यो जस्ताको त्यस्तै हुँदैन’, पोखरेलको भनाइ छ ।

तर ओलीले महासचिवको यो भनाइलाई खास रुचाएका छैनन । आफूलाई एमालेको भावी अध्यक्षको रुपमा प्रस्तुत गर्दै आएका पोखरेलले ओलीलाई छलेर अध्यक्ष घोषणा गरेको र १० बुँदे कार्यान्वयन हुँदैन भन्ने अभिव्यक्तिप्रति ओलीले सार्वजनिक रुपमा टिप्पणी नगरेको भएपनि पोखरेलको भनाईमा रुची नदिई उडाइरहेका छन् ।

१० बुँदेमा लेखिए अनुसार पार्टीका सबै तहका कमिटी, निकाय र जनसंगठनहरू नवौं राष्ट्रिय महाधिवेशनबाट पारित राजनीतिक कार्यदिशा र विधानको व्यवस्थाबमोजिम नेपाल कम्युनिस्ट पार्टी (नेकपा) गठन हुनुपूर्व २०७५ जेठ २ को संगठनात्मक अवस्थाबाट क्रियाशील हुने जनाइएको छ । एमालेभित्र माओवादीका नेताहरु पनि आएकाले उनीहरुको व्यवस्थापनका लागि पनि १० बुँदे हुबहु लागु हुन समस्या परेको बताइन्छ । यद्यपि अबको कार्यविभाजनपछि यो समस्या हट्ने एमाले नेताहरुले बताइरहेका छन् ।