सीमामा सशस्त्र प्रहरीमाथि बारम्बर किन आक्रमण हुन्छ ?

४ असोज, काठमाडौं । नेपाल–भारत सीमा क्षेत्रमा खटिएका सशस्त्र प्रहरीमाथि कञ्चनपुरमा गरिएको आक्रमण पहिलो पटक भएको होइन । यस्तो आक्रमण पटक पटक हुने गरेको छ । भारतीय तस्कर समूहले नेपालतर्फ खटिएका सशस्त्र प्रहरी जवानमाथि पटक पटक आक्रमण गर्दैै आएका छन् । एक वर्ष अघि (२०७७ साउन ७) झापामा सीमा सुरक्षामा खटिएका सशस्त्र प्रहरी र भारतीय तस्कर समूहबीच झडप भएको थियो । राति साढे ११ बजे झापाको गौरीगन्ज गाउँपालिका–५ स्थित सीमा क्षेत्रमा झडप हुँदा पनि त्यहा सशस्त्र प्रहरी जवान घाइते भएका थिए ।

त्यस्तै रौतहटमा सीमामा आवतजावत रोकिएका कारण जबरजस्ती नेपाल प्रवेश गर्न खोज्ने भारतीय महिलालाई रोक्दा सशस्त्र प्रहरीमाथि हँसिया प्रहार भएको थियो । २०७७ साउनमै रौतहटको परोहा नगरपालिका ८ नरकटियाको सीमाबाट नेपालभित्र प्रवेश गर्न खोज्ने दुई भारतीय महिलालाई रोक्दा भारतीय पक्षले प्रहार गरेको हँसियाबाट चोट लागेर एकजना सशस्त्र प्रहरी घाइते भएका थिए ।

२५ जेठमा नवलपरासीको प्रतापपुर गाउँपालिका– ५, बसहिया चेकपोस्टमा समेत सशस्त्र प्रहरीमाथि आक्रमण भयो । २ सय जनाभन्दा बढीको समूहमा आएका भारतीय नागरिकको आक्रमणमा परेर ६ जना सशस्त्र प्रहरी नै घाइते भए । सो घटनामा सशस्त्र प्रहरीले ४ राउण्ड गोली नै चलाएको थियो । माथि उल्लेखित घट्ना प्रतिनीधि मात्रै हुन् । यसरी सशस्त्र प्रहरीमाथि सीमाक्षेत्रका दर्जनौं चेक पोष्टमा सानाठूला आक्रमण भएका छन् ।

सोमबार पनि कञ्चनपुरको दोधारा–चाँदनीमा सशस्त्र प्रहरीका जवानमाथि भारतीय तस्करको समूहले आक्रमण गरेका छन् । भारतबाट नेपाल तर्फ भन्सारी छली सामानहरु ल्याउन खोज्ने भारतीय तस्कर समूहलाई रोक्न खोज्दा सशस्त्र प्रहरीका जवानमाथि आक्रमण भयो । यो विषयमा सशस्त्र मूख्यालयस्थित सूचना शाखाले कुनै पनि प्रतिक्रिया जनाएको छैन ।

कञ्चनपुरको दोधारा–चाँदनी नगरपालिका–८ मा अवैध सामान रोक्न खोज्ने सशस्त्र प्रहरीका सुदीप सुनारसहित तीन जना सशस्त्र प्रहरीका जवानमाथि हातपात भएको हो । चिनी लगायतको बोरामा सामान बोकेर आएको ८ जनाको समूहले उनीमाथि आक्रमण गरेको सशस्त्र प्रहरी स्रोतले जनाएको छ । तस्कर समूहले नेपाल तर्फ ल्याएको सामान र मोटरसाइकल नियन्त्रणमा लिएको थियो । तर सो समूहले सशस्त्र प्रहरीमाथि आक्रमण गरेर नियन्त्रणमा लिएको सामान लिएर फरार भएका थिए । सशस्त्र प्रहरी बल नेपाल नम्बर ३५ गण शैलेश्वरीका प्रमुख सशस्त्र प्रहरी उपरीक्षक (एसपी) वीरेन्द्र ऐरले आफ्ना जवानहरुमाथि आक्रमण भएको स्वीकार गरे ।

शैलेश्वरी गण अन्र्तगत १२ वटा बोर्डर आउटपोष्ट (बीओपी)रहेका छन् । सो गणमा ६२१ जना जनशक्ति हुने र एउटा बिओपीमा ३५ जनाको जनशक्ति रहेको ठाउँमा कसरी तीन जना प्रहरीमाथि आक्रमण भयो र सशस्त्र प्रहरीले नियन्त्रणमा लिएको समाना कसरी लिएर भागे भन्ने प्रश्न उठेको छ । ‘सो गण मातहत १२ वटा विओपीमा ३५ जना संख्या हुनुपर्नेमा कसरी आक्रमण भयो भन्ने प्रश्न उठेको छ, यो विषयमा हामी बुझ्दै छौ’, सशस्त्र प्रहरी मूख्यालयले भन्यो । स्रोतका अनुसार २ सय भन्दा बढी जनशक्ति कहाँ खटाइएको छ यस विषयमा गणपतिसँग कुराकानी भैरहेको र त्यहाँको आक्रमणबारे अनुसन्धान हुने मुख्यालय स्रोतले जनाएको छ ।

सीमा नाकामा भारतीय तस्करहरुले सशस्त्र प्रहरी जवानमाथि आक्रमण हुन थालेपछि सशस्त्र प्रहरी मुख्यालयले यसअघि सबै गण तथा गुल्ममा भएका कर्मचारीलाई चुस्तदुरुस्त राख्न र जवानहरुको सुरक्षामा ध्यान दिन तथा सर्पोटिङ टोली राख्न निर्देशन दिएको थियो । तर गण र गुल्मपतिहरुले बीओपीमा ३५ जना खटाउनु पर्नेमा २० जना, पोष्टमा ७ जना पठाउनु पर्नेमा तीन जना पठाउदै आएका छन् । ‘आज कञ्चनपुरमा आएको समस्या पनि यही जनशक्ति थोरै खटिदा सशस्त्र प्रहरीमाथि आक्रमण भएको त्यहाँको कमाण्डरको कमजोरीले प्रहरी कर्मचारीहरुमाथि आक्रमण हुँदै आएको छ’, सशस्त्र प्रहरी मूख्यालय स्रोतले भन्यो ।

सशस्त्र प्रहरी मूख्यालयका अनुसार सबै गणमा विओपीलाई पुग्ने गरी संख्य खटाएको हुन्छ तर फिल्डमा भने तीन जना मात्रै खटिएका समाचार आउन थालेपछि मूख्यालयले त्यसो नगर्न र सुरक्षित ढंगले डिउटी खटाउन निर्देशन दिएको थियो । ‘कमाण्डरले  घर विदामा पठाउने र जनशक्ति अभाव हुने देखिएको छ यस्तो नहोस भन्नका लागि केहीदिन भित्रै सबै यूनिटको अनुगमन हुनेछ’, सशस्त्र प्रहरी मूख्यालय स्रोतले भन्यो ।