सशस्त्र डीआईजी सरुवामा राजनीतिक हस्तक्षेप !

८ असाेज, काठमाडाैं । नेपाल सरकारले सशस्त्र प्रहरीका ११ जना सशस्त्र प्रहरी नायव महानिरीक्षक (डीआईजी) हरुको सरुवा गरेको छ । गृहमन्त्री बालकृष्ण खाँडको निर्णयले बिहीबार सांझ सो सरुवा गरिएको सशस्त्र प्रहरीले जनाएको छ ।

गृहमन्त्री खाँडले विभिन्न राजनीतिक दलका नेताहरुलाई खुशी पार्ने क्रममा एमालेबाट विभाजित भएर बनेको नेकपा एस पार्टीको तर्फबाट गणेश ठाडा मगरलाई प्रदेश २ को जिम्मेवारी दिइएको छ । प्रदेश २ मा रहेका सीपी गौतमलाई तानेर उनलाई पठाइएको हो ।

सशस्त्र प्रहरीका अर्का डीआईजी अभि खत्रीलाई मूख्यालय छिर्नबाट रोक लगाइएको छ । सशस्त्र प्रहरी बलको केन्द्रिय लेखा स्टोरमा २०७५ पुष महिनामा भएको आगलागीमा उनको संलग्न भएपनि उनलाई जोगाइएकाले उनलाई मूख्यालय छिर्नबाट रोक लगाइएको हो ।

तत्कालिन आर्थिक प्रशासन प्रमुख खत्रीमाथी गम्भिर रुपमा छानबिन हुन नसक्दा रहस्यमय आगलागीको छिनोफानो हुन नसके र मध्यरातमा पेट्रोल छर्केर आगो लगाउने कार्यमा तल्ला तहका कर्मचारी माथी अनुसन्धान भएपछि उनी जोगिएका थिए । उनको बद्मासीको बारेमा जानकार रहेको मूख्यालयले उनको सरुवा यथावत राखेको छ ।

डीआईजी मन्दिप श्रेष्ठलाई गढिमाई वाहिनी हेटौंडाबाट सशस्त्र प्रहरी मुख्यालयमा आईजीपीको सचिवालयमा सरुवा गरिएको छ भने हेटौडामा डीआईजी किशोर प्रधानलाई पठाइएको छ । प्रधान विन्ध्यावासिनी वाहिनी मुख्यालय, रुपन्देहीका प्रमुख थिए । एउटा कमाण्डबाट अर्को कमाण्डमा जान पाउने भाग्मानीमध्ये एक परेका छन् डीआईजी प्रधान ।

डीआईजी कुलबहादुर नेम्बाङ्गलाई प्रधान कार्यालयको मानवस्रोत विभागबाट विन्ध्यावासिनी वाहिनी, रुपन्देही सरुवा गरिएको छ । त्यसैगरी,डीआईजी राजु अर्याललाई पशुपतिनाथ वाहिनी, काठमाडौंको प्रमुखबाट प्रधान कार्यालयको मानवस्रोत विभागमा सरुवा गरिएको छ । पशुपति वाहिनीको प्रमुखमा डीआईजी बंशीराज दाहाललाई लगिएको छ ।

यसअघि दाहाल बराह वाहिनी मुख्यालय सुनसरीका प्रमुख थिए अर्थात् पूर्वाञ्चलका कमाण्डर थिए । दाहाल पनि एउटा कमाण्डबाट अर्को कमाण्डमा जान पाउने भाग्यमानी डीआईजी ठहरिएका छन् । पूर्वाञ्चलको नयां कमाण्डरमा डीआईजी कमल गिरी लगिएका छन् । उनी सशस्त्र प्रहरी महानिरीक्षकको सचिवालय मुख्यालयमा कार्यरत थिए ।

सशस्त्र प्रहरीको पश्चिमाञ्चल पोखराको कमाण्डरबाट डीआईजी नारायणदत्त पौडेललाई सरुवा गरी मुख्यालयको कार्य तथा सीमा सुरक्षा विभागमा लगिएको छ भने पश्चिमाञ्चलको कमाण्डरमा डीआईजी शम्भु सुवेदीलाई खटाइएको छ । सुवेदी राष्ट्रिय सुरक्षा परिषद् सचिवालय सिंहदरवारमा कार्यरत थिए । सुरक्षा परिषदमा तत्कालका लागि कसैलाई पनि सरुवा गरिएको छैन ।

यसैगरी दुई नं प्रदेशका कमाण्डर डीआईजी चन्द्रप्रकाश गौतमलाई कार्य तथा सीमा सुरक्षा विभाग मुख्यालयमा सरुवा गरिएको छ । गौतमको ठाउंमा डीआईजी गणेशबहादुर ठाडा मगरलाई लगिएको हो । २ नं प्रदेशको कमाण्ड बनाइएका ठाडा यसअघि मुख्यालयमा कार्य तथा सीमा विभागमा कार्यरत थिए । उनलाई रामकुमारी झाक्रीले २ प्रदेश पठाउन दबाब दिएकी थिइन । सशस्त्र प्रहरी मुख्यालयको मानवस्रोत विभागमा कार्यरत डीआईजी दुर्गाप्रसाद भट्टराईलाई सुदुर पश्चिम प्रदेशको कमाण्डर बनाई कैलाली पठाइएको छ ।

सशस्त्र प्रहरीका ११ डीआईजी, को कहाँ ?