प्रदेश २ मा राजश्व असुलीमा प्रहरी आक्रामक बन्दै

२० मंसिर, वीरगञ्ज । अवैध सामान तथा तस्करी नियन्त्रणमा व्यापक प्रहरी परिचालनपश्चात् राजश्व असुलीमा उल्लेख्य सुधार भएको भन्सार कार्यालयले जनाएको छ ।

प्रदेश नं. २ सशस्त्र प्रहरी बल छिन्नमस्ता वाहिनीले अवैध कार्यविरुद्ध अभियान सञ्चालन गरेपछि पक्राउ अभियान बढेको हो ।
नयाँ नेतृत्व अर्थात् सशस्त्र प्रहरीका डीआईजी गणेशबहादुर ठाडा मगर आएपश्चात् तस्करीजन्य कार्य नियन्त्रणमा थप आक्रामक बनेको सशस्त्र प्रहरी बल छिन्नमस्ता वाहिनी क्रमशः राजश्व असुलीमा विभिन्न उपलव्धि हासिल गरेको देखिन्छ । गत डेढ महिनामा करिब १० करोड बराबरको अवैध सामान बरामद गरेको तथा तस्करी नियन्त्रणमा प्रहरी परिचालन गरिएको छ ।

गत असोज महिनाका लागि १७ अर्ब एक करोड ३४ लाख ११ हजार ५ सय अनुमानित लक्ष्य तोकिएका २ नं प्रदेशको विभिन्न भन्सार कार्यालयहरुबाट लक्ष्यभन्दा ३ अर्ब ९१ करोड बढी अर्थात् २० अर्ब ९२ करोड ४७ लाख ४५ हजार ७ सय ४ राजश्व संकलन गर्न सफल भएको तथ्यांकले देखाएको छ ।

राजश्वको वृद्धि यो महिनासमेत २० प्रतिशतभन्दा बढी उठ्ने संकेत देखिएको छ तर अन्तिम डाटा आउन बाँकी रहेको अवस्था छ ।
यसबाहेक विभिन्न खालका लागूऔषधसहित ११ जना व्यक्ति पक्राउ परेका छन् भने ललाईफकाई भारत लैजान लागेका ४ बालिकासहित ४ व्यक्तिलाई पनि प्रहरीले समाएको छ । तिहार लगायत चाडपर्वको अवसरमा ४ लाखभन्दा बढी मूल्यका विभिन्न खाले पटकाहरु बरामद गरी नष्ट गरेको पनि बताइएको छ । सशस्त्र प्रहरी बल विपद् तथा सडक दुर्घटना उद्धार कार्यमा परिचालन लगायतका कार्यमा पनि सक्रिय सहभागी भएको देखिन्छ ।

सूचनाको प्रभावकारी परिचालनपश्चात् गत कार्तिक २८ गतेबाट सबै जिल्लाहरुमा लगाइएको गाँजा फँडानी सुरु गरेको सशस्त्र प्रहरीले संयुक्त रुपमा महोत्तरी र सर्लाहीको करिब १४ बिघामा लगाइएको गाँजा नष्ट गरेको छ । यस क्रममा करिब १० ट्रक गाँजा नष्ट गरेको वाहिनी प्रमुख डीआईजी गणेशबहादुर ठाडा मगरले बताएका छन् । वाहिनी श्रोतका अनुसार यो अभियान अन्य जिल्लाहरुमा समेत निकट भविष्यमा सञ्चालन गर्ने गरी कयौँ बिघामा लगाइएको गाँजा नष्ट गरिने योजना रहेको बताइएको छ ।

यस अलावा यो अवधिमा पर्सा, बारा, सप्तरी, महोत्तरीलगायका जिल्लाका विभिन्न स्थानबाट करिब २ सय ५० केजीभन्दा बढी तयारी गाँजा, २२ केजी चरेस तथा व्यक्तिहरु पक्राउ गरी नेपाल प्रहरीलाई बुझाएको छ । कार्तिक २८ मा महोत्तरीको एकडाँडा इलाकाबाट ४४ केजी तथा कार्तिक ३० गते राति बाराको बेनौली इलाकाबाट थप ४० केजी गाँजा बरामद गरिएको थियो ।

भरपर्दो सूचना तथा प्रभावकारी परिचालनको कारण विभिन्न जिल्लाका विभिन्न स्थानबाट चोरी तस्करीबाट ल्याउँदै गरेको तथा लुकाईछिपाई राखेको करिब ५ सय क्यु फिट काठ बरामद गरी विभिन्न वन कार्यालयहरुमा बुझाएको छ ।

यसै क्रममा कार्तिक २९ गते रौतहट वृन्दावन नपा–६ इसा महमद्को घर इलाकाबाट ११ गोलिया ९३३ क्यु फिट० तथा ६९.२४ क्यु फिट चिरान काठ बरामद गरी वन कार्यालय चन्द्रपुरमा बुझाएको छ ।

त्यस्तै गत शुक्रबार जिल्ला महोत्तरी एकडाँडा गाउँपालिका–५ गेना बथनाहामा सशस्त्र प्रहरी बल नेपाल नं. २ छिन्नमस्ता वाहिनी मुख्यालय बर्दिबास महोत्तरीबाट खटिएको सप्रबह मन्तोषकुमार सिंहको ५ जनाको स्क्वाड टोलीले चेक जाँच गर्ने क्रममा नेपालबाट भारततर्फ ३ जना व्यक्तिहरु क्रमशः महोत्तरी एकडाँडा–५ बस्ने वर्ष ३६ को रमेश पासवान, वर्ष ६० का राम खेलावन मण्डल र महोत्तरी जलेश्वर–७ बस्ने वर्ष ५० को सुरेश यादवले लैजाँदै गरेको प्रतिबन्धित लागूऔषध गाँजा १ सय १.५ केजीसहित उनीहरुलाई नियन्त्रणमा लिई जिल्ला प्रहरी कार्यालय महोत्तरीमा बुझाएको कुरा डीआईजी मगरले बताएका छन् ।