शेरबहादुरले सर्वसम्मत सभापतिमा रामचन्द्रलाई प्रस्ताव गर्न निधिको आग्रह

२४ मंसिर, काठमाडौं । नेपाली कांग्रेसका उपसभापति विमलेन्द्र निधिले वरिष्ठ नेता रामचन्द्र पौडेललाई सभापतिमा प्रस्ताव गर्न शेरबहादुर देउवालाई आग्रह गरेका छन् ।

देउवाले रामचन्द्रलाई सभापतिमा प्रस्ताव गर्ने हो भने निर्विरोध रुपमा नेतृत्व चयन हुने उनको भनाई छ अन्यथा सभापतिमा आफ्नो उम्मेदवारी कायमै रहने अडान उनले लिएका छन् ।

चितवन–काठमाडौं प्रजातान्त्रिक समाजले शुक्रबार ललितपुरमा गरेको कार्यक्रममा निधिले १३ औं महाधिवेशनमा सभापति लडेका तीन नेताले पार्टी सभापतिमा फेरि दाबी नगर्नु राम्रो हुने बताए । त्यस्तो अवस्थामा सभापतिका चार दावेदारबीच सहमति खोज्ने र नभए निर्वाचनमा जाने उनले बताए । देउवाले रामचन्द्रलाई समर्थन गरिदिने हो भने आफूहरुमाथि पनि दबाब पर्ने उनको भनाइ थियो ।

निधिले भने, ‘शेरबहादुरजीले सर्वसम्मत सभापतिमा रामचन्द्र पौडेलको नाम प्रस्ताव गर्नुहुन्छ भने मान्न सकिन्छ ।’ अन्यथा आफू पनि सभापतिमा उम्मेदवार बन्ने र पदाधिकारीको टिम नै बनाएर प्रतिस्पर्धा गर्ने उनले बताए ।

उनले जनताको र नेपाली कांग्रेसका शुभेच्छुक साथीहरुको भावना हेर्दाखेरि आगामी चुनावका लागि पनि नेपाली कांग्रेसमा एकता भइदियो भने राम्रो हुन्छ भन्ने सबैको चाहना भएकोले पनि देउवाले रामचन्द्रलाई सभापतिमा प्रस्ताव गर्नुपर्ने उनको भनाइ छ । उनले भने, ‘देउवाले रामचन्द्रजीलाई प्रस्ताव गरिदिनुभयो भने निर्विरोध हुने सम्भावना बढी हुन सक्छ ।’ यसले कांग्रेसमा एकताको सन्देश प्रवाह हुने निधिको भनाइ छ ।