एक हप्ताभित्र प्रदेश १ को मन्त्रीमण्डल विस्तार गरिने

२९ मंसिर, विराटनगर । प्रदेश नम्बर १ का मुख्यमन्त्री राजेन्द्र राईले एक हप्ताभित्रै प्रदेश सरकारको मन्त्रीपरिषदलाई पूर्णता दिइने जानकारी दिएका छन्।

उनले अहिले भइरहेका ७ मन्त्रालयलाई फुटाएर ९ वा ११ वटा बनाइने जनाए।उनले नेपाली कांग्रेसका साथीहरू महाधिवेशनमा व्यस्त भएकोले मन्त्रीपरिषद विस्तारमा ढिलाई भएको बताए । उनले भने, ‘उहाँहरू फर्किएपछि गठबन्धनको बैठक बसेर मन्त्रिपरिषदलाई पूर्णता दिइनेछ। थोरै मन्त्रालय हुँदा काम गर्न भ्याइँदो रहेनछ। धेरै ठूलो बनाउनु पनि राम्रो हुँदैन। त्यसैले ९ वा ११ मन्त्रालय बनाउने सोच छ।’

त्यस्तै उनले मन्त्रिपरिषदले पूर्णता पाएपछि प्रदेश सभाको आगामी हिउँदे अधिवेशनमा प्रदेशको नामकरण गरिने बताए । ‘प्रदेशको नामकरण गर्न प्रदेश सभाको दुई तिहाईले निर्णय गर्नुपर्छ’, मुख्यमन्त्री राईले भने., ‘तर हामी कसैको पनि दुई तिहाई छैन। तथापि हामी सबैको सहमतिमा प्रदेशको नामकरण टुङ्ग्याउनेछौँ।’