२८०० मत गन्दा उपसभापतिमा खड्का र गुरुङको अग्रता

२९ मंसिर, काठमाडौं । नेपाली कांग्रेसको १४ औं महाधिवेशन अन्तरगत सोमबार भएको मतदानको उपसभापतितर्फको जारी मतगणनामा अहिलेसम्म २८०० मत गणना भएको निर्वाचन समितिले जनाएको छ ।

मत परिणाम अनुसार पूर्णबहादुर खड्काको अग्रता कायमै छ । खड्काले १३२१ मत ल्याएका छन्। दोस्रो स्थानमा रहेका धनराज गुरुङले १२६७ मत ल्याएका छन्।  त्यस्तै चन्द्र भण्डारीले १११५ र विजयकुमार गच्छदारले १२१३ मत ल्याएका छन्। गुरूङ र भण्डारी सभापतिमा पराजित शेखर कोइराला समूहका हुन् । खड्का र गच्छदार सभापति निर्वाचित शेरबहादुर देउवा समूहका उम्मेदवार हुन्।

उपसभापतिमा स्वतन्त्र उम्मेदवारी दिएका महेश आचार्य, प्रकाशमान सिंह पक्षबाट उम्मेदवारी दिएकी सुजाता कोइराला र विमलेन्द्र निधि पक्षबाट उम्मेदार बनेकी दिव्यश्वरी शाह प्रतिस्पर्धामा धेरै पछाडि छन् ।

सोमबार भएको मतदानमा उपसभापति दुई (२) पदका लागि पार्टीका नेता गच्छदार, खड्का, आचार्य, कोइराला, भण्डारी, गुरुङ र शाहले उम्मेदवारी दिएका थिए । जम्मा चार हजार ७४३ मतदातामध्ये चार हजार ६७९ मतदाताले मतदान गरेका थिए ।

कांग्रेस केन्द्रीय कार्यसमितिका पदाधिकारी र सदस्य गरी १३२ पदका लागि मतदान भएको थियो । सभापतिबाहेक अन्य पदको मतगणना कांग्रेस केन्द्रीय कार्यालयमा हुन लागेको हो । उपसभापति पदको मतपरिणाम आएलगत्तै अन्य पदाधिकारी र केन्द्रीय सदस्य पदको मतगणना सुरु गरिने समितिले जनाएको छ ।