सशस्त्रको यान्त्रिक कार्यशालाका प्रमुख एसपी हुमागाइमाथि छानविन शुरु

८ पुस, काठमाडौं । महिनौंसम्म कर्मचारीलाई आउट छाडेको भन्दै सशस्त्र प्रहरी बल हातहतियार तथा यान्त्रिक कार्यशाला (आर्मोरर), बलम्बुका एसपी नानीराम हुमागाईं छानविनमा परेका छन् । सो कार्यशालामा रहेका जनशक्तिलाई बिदामा छाडेको र उनीहरुले खाइपाई आएको राशनभत्तामा एसपीले आँखा लगाएको मात्र होइन, असुल गरेको आरोप लागेपछि उनीमाथि छानविन गरिएको सशस्त्र प्रहरी मूख्यालय स्रोतले जनाएको छ ।

उनीमाथि सिपाहीलाई मनलाग्दी बिदा बस्न लगाएर तोकिएको जिम्मेवारी पूरा नगरी तलबभत्ता मात्र खुवाएको आरोप लागेको स्रोतको दावी छ । उनीमातहत ८० जना कार्यरत छन् । यसमध्ये एक चौथाईभन्दा कम कर्मचारीलाई मात्र कार्यालयमा राखी अरू सबैलाई बिदा छाड्ने गरेको उजुरी परेको थियो । सो उजुरीको विषयमा छानविन गर्न सशस्त्र प्रहरीका एसएसपी दीपेन्द्र शाहको कमाण्डमा टोली खटाइएको थियो ।

‘महिनौंसम्म आउट रहेपनि तलब–भत्ता भने खाइरहने उनीहरूले फोकटमा बरालिएर राज्यबाट तलबभत्ता बुझेबापत हाकिमलाई रासनबापतको रकम बुझाउने गरेका छन्’, स्रोतले भन्यो । स्रोतका अनुसार ८० जना कर्मचारीमध्ये २५ जनालाई नियमित काममा लगाई ५५ जनालाई बिदा छाडेर उनीहरूको रासनवापतको नगद हात पार्दा मासिक अतिरिक्त आम्दानी गर्दा मासिक २ लाख भन्दा बढी रकम लिने गरेका थिए ।

सशस्त्र प्रहरीमा जनशक्ति अभाव भैरहेको भन्दै महानीरिक्षक शैलेन्द्र खनालले गृहमन्त्रालय र अर्थमन्त्रालयमा प्रस्ताव गरिरहँदा सशस्त्रकै केही कमाण्डरहरुले तोकेको स्थानमा डिउटी नखटाउने र भएकैलाई घर बिदा छाड्ने गरेका गुनासा आएपछि मूख्यालयले त्यस्ता स्थानमा छड्के जाँच गर्न थालेको छ । अहिले सो यान्त्रिक कार्यशालामा शान्ति स्थापनार्थ द्वन्द्वग्रस्त मुलुकमा खटिँदा सशस्त्र प्रहरीले प्रयोग गर्ने ५४ वटा महँगा सवारी साधन पनि छन् । ती साधन दैनिक २ लिटर इन्धन राखी स्टार्ट गर्नुपर्छ । अरू ६ वटा ठूला सवारीसाधनलाई दिनहुँ ३ लिटर इन्धन राखी स्टार्ट गरेर तन्दुरुस्त राख्नुपर्ने हुन्छ । यस्तोमा पनि घोटाला हुने गरेको स्रोतको दावी छ ।

गाडी स्टार्ट गर्न दैनिक प्राप्त हुने १२६ लिटर इन्धन सदुपयोग भन्दा बढी दुरुपयोग हुने गरेको स्रोतले जनाएको छ । तीन दिनमा एकपटक गाडी स्टार्ट गर्दा मासिक २० दिनको इन्धन बचत हुन्छ । दैनिक १२६ लिटरका दरले २० दिनको २५२० लिटर इन्धन फोकटमा हात पर्छ । गत सोमबारको पेट्रोलको मूल्य प्रतिलिटर १४२ ले हिसाब गर्दा हिनामिना गरेबापत एक महिनामा ३ लाख ५७ हजारभन्दा बढी बचाउने गरेको यान्त्रिक कार्यशाला स्रोतले जनाएको छ ।

मुख्यालयले गाडीको मर्मतसम्भार शीर्षकमा वार्षिक ४२ लाख रुपैयाँ पठाउने गरेको छ । तर ०७४ सालदेखि खासै मर्मत गरिएको छैन । तैपनि, वार्षिक आउने रकम भने नक्कली बिल बनाएर खपत भैरहेको स्रोतको दावी छ । राशनमा कम गुणस्तरका सामग्री प्रयोग गर्ने, तोकिएको सूची अनुसारका नखुवाउने त कमाण्डर र मेसको जिम्मा लिएका सई देवेन्द्र श्रेष्ठको समेत संलग्नता रहेको बताइन्छ ।

देवेन्द्र कोषराज वन्तसँगै अख्तियारको निलम्बनमा परी अनेक प्रपञ्च मिलाएर आएका पात्र हुन् । देवेन्द्रले वार्षिक १२ लाख बुझाई मेसको जिम्मा लिएको समाचार स्रोतको भनाई छ । अहिले एसएसपी शाहले सो विषयमा पनि छानविन गरिरहेका छन् । ‘एसएसपी शाहले छानविन गरेको सत्य हो उहाँले प्रतिवेदन बुझाउन बाँकी रहेको छ’, स्रोतले भन्यो ।