वालिङका कृषकहरुलाई बिउबिजन बितरण

२६ पुस, वालिङ । वालिङका कृषकहरुलाई बिउबिजन बितरण गरिएको छ । नगरभित्रका कृषकहरुलाई मौसम अनुसारका लहरेबालीका बिउबिजन बितरण गरिएको हो ।

वालिङ नगरपालिका र युएनडिपी नेपालको साझेदारी तथा दियालो संस्थाको व्यवस्थापनमा वालिङमा सञ्चालन भईरहेको ‘कोभिड १९ उद्धार र सामाजिक आर्थिक प्रतिकार्य पहल परियोजना’को आयोजना तथा ‘उद्यमशीलता व्यवशाय प्रवद्र्धन तथा नवप्रवर्तन केन्द्र ईविक’को सहजीकरणमा बिउबिजन बितरण गरिएको हो ।

बिउबिजन बितरण गर्दै वालिङ नगरउपप्रमुख कल्पना तिवारीले कृषकको उत्पादन बढाउन र बजारीकरणका लागि बिभिन्न कार्यक्रम सञ्चालन गरिरहेको जानकारी दिए । कृषकहरुलाई बिभिन्न सहयोग गर्दै लागत कम गर्ने र कृषि उत्पादनमा आत्मनिर्भर बनाउनेमा नगरको जोड रहेको उपप्रमुख तिवारीले बताए ।

कार्यक्रममा बोल्दै प्रमुख प्रशासकीय अधिकृत राजन भट्टराईले कृषकहरुको उत्पादन बढेमा मात्रै समग्र नगरको आर्थिक बिकास हुने बताए । उनले भने, ‘कृषकहरुको मेहनतलाई नगरले कदर गर्दै उनीहरुको काममा साझेदारी गरिरहेको छ ।’ कार्यक्रममा वालिङ नगरपालिका कृषि शाखा प्रमुख शुभाष अर्यालले बिउबिजन लगाउने तरिका तथा यसबाट धेरै फल लिन सकिने तरिकाका बारेमा जानकारी गराए ।

दियालो संस्थाका अध्यक्ष कविता तिवारीले कृषकहरुको माग र आवश्यक्ताका आधारमा परियोजना मार्फत बिउबिजन बितरण भईरहेको जानकारी गराए । कृषकहरुले अनुदानमा पाएका सामाग्री तथा बिउबिजनको राम्रो सदुपयोग गरिहेको आफूहरुले पाएको अध्यक्ष तिवारीले बताए ।

कार्यक्रमको सञ्चालन दियालो युएनडिपीका अधिकृत गंगाधर खनाल राजुले गरेका थिए । नगरका १४ वटै वडाका कृषक समूह, व्यवशायीक कृषक तथा नव व्यवशायीक कृषकहरुलाई बिभिन्न चरणमा गरी पाँचसय जनालाई बिउबिजन बितरण गरिएको परियोजना प्रमुख राधाकृष्ण डुम्रेले जानकारी दिए ।