मानवसेवा आश्रम सुदूरपश्चिम प्रदेश शाखाको भवन निर्माणको शिलान्यास सम्पन्न

४ फागुन, धनगढी । मानवसेवा आश्रम (मानवता प्रवर्द्धन महाअभियान)को सुदूरपश्चिम प्रदेश शाखाको भवन निर्माणको शिलान्यास हर्षोल्लासका साथ सम्पन्न भएको छ । आज भवन निर्माण स्थलमा एक कार्यक्रम गरि शिलान्यास गरिएको हो ।

सडकपेटी एवं सार्वजनिक स्थलमा रहेका सहयोगापेक्षी (बेसहारा, अशक्त, असहाय, अनाथ, अभिभावकविहीन, मानसिक तथा शारीरिक रुपमा कमजोर) व्यक्तिहरुको उद्धार गरि संरक्षण गर्नका लागि मानवसेवा आश्रमको भवननिर्माण गर्न लागिएको हो ।

शिलान्यास कार्यक्रममा बोल्दै सभामुख अर्जुन बहादुर थापाले मानवसेवा आश्रमको भवन निर्माणको आवश्यकता प्रष्टाए । उनले भने, “यहाँ मानवसेवा आश्रमको भवन निर्माण हुँदै छ । यसले सम्पूर्ण सुदूरपश्चिम प्रदेश बासीको लागि, मानव जातिको लागि एउटा इतिहास सिर्जना गर्दै छ । अब सडकमा कोहि पनि मानिस हुने छैनन्, हेर्नुहोस् त मानवसेवा आश्रमको कति सुन्दर उद्धेश्य छ ।”

त्यस्तै कार्यक्रमका प्रमुख अतिथि एवं सुदूरपश्चिम प्रदेश सरकारका मुख्यमन्त्री त्रिलोचन भट्टले निर्माण कार्यको लागि सबै जनालाई साथ र सहयोगका लागि अपिल गरे । “हामीलाई थाहा छ, मानव सबै प्राणी भन्दा बौद्धिक छ र मानवले आफ्नो लागि मात्र होइन, अरुको लागि पनि गर्नुपर्छ भन्ने हामी सबैको भावना छ । मानिस सधैँ जीवित रहन राम्रो कार्य गर्न पर्छ । सबैजना सम्मानजनक तरिकाले बाँच्न पाउने समाज निर्माणमा मानवसेवा आश्रमको भूमिका महत्वपूर्ण छ । सबैजनालाई यो भवन निर्माण सम्पन्न गर्नका लागि सहयोग गर्न अनुरोध गर्दछु ।”

“जब मानिस यस संसारमा आउँछ उसको पालन पोषण परिवारको दायित्व हो । तर जब नागरिक संकटमा आउँछ त्यसको जिम्मेवारी सरकारको हुन्छ । हामीले धेरै गर्न नसके पनि यस बर्ष ४० लाख रकम विनियोजन गरेका छौँ । यो सुरुवात हो । हामीले निरन्तरता दिने छौँ । प्रदेशलाई नै सहयोगापेक्षी सडकमानवमुक्त बनाउनका लागि समेत प्रदेशले कार्य योजना अगाडी बढाउने छ ।” उनले थपे ।

कार्यक्रममा बोल्दै धनगढी उपमहानगरपालिका वडा नं. १५ का वडा अध्यक्ष एवं कार्यक्रमका सभाध्यक्ष फुल राम चौधरीज्यूले मानवसेवा आश्रमको भवननिर्माणको कार्य समाजको अन्धकारमा उज्यालो प्रकाश छर्ने कार्य भएको भावना व्यक्त गरे ।

“हामी जहिले पनि नकारात्मकता तर्फ अग्रसर हुन्छौँ तर अँध्यारोमा उज्यालो छर्न लागेका हुँदैनौँ । मानवसेवा आश्रमको कार्य प्रकाश छर्ने कार्य हो । कम्तिमा थोरै भए पनि केही गर्ने प्रयास हुँदैछ ।”

चौधरीले यस कार्यले भवन निर्माण हुने हाम्रो वडा मात्र नभएर सम्पूर्ण प्रदेश बासीको मनमा उज्यालो छाएको प्रतिक्रिया दिए ।

मानवसेवा आश्रमको सुदूरपश्चिम प्रदेश शाखा हाल धनगढी ५ तारानगरमा घर भाडामा सञ्चालन भइरहेको छ । घर भाडाबाट मुक्त भई सेवाको दीर्घकालिन व्यवस्थापनका लागि वडा नं. १५ (जडीबुटी प्रशोधन केन्द्र सँगै० मा रहेको शिव मन्दिर धार्मिक बनमा भवन निर्माणको शिलान्यास भएको हो । उक्त स्थानमा मनवसेवा आश्रमको भवन मात्र नभएर मानवता अध्ययन केन्द्र र ज्येष्ठ नागरिक मनोमञ्जन केन्द्र समेत बन्ने मानवसेवा आश्रमका अध्यक्ष रामजी अधिकारीले जानकारी गराए ।

कार्यक्रममा भूमी व्यवस्था तथा सहकारी मन्त्रालयका राज्य मन्त्री, धनगढी उपमहानगरपालिकाका नगर प्रमुख, कैलालीका प्रमुख जिल्ला अधिकारी, कैलाली जिल्लाका, प्रहरी प्रमुख लगायत महत्वपूर्ण समाजसेवी व्यक्तिहरु र स्थानीय गरि करिब ४०० जनाको उपस्थिति रहेको थियो ।