अब भारतबाहेक अन्य देशबाट नेपालमा रसायनिक मल ल्याउन प्रतिबन्ध !

१८ फागुन, काठमाडौं । नेपाल र भारत सरकारबीच जिटुजी प्रक्रियामार्फत मल खरिदबिक्री गर्ने सम्झौता भएपछि धेरैलाई लागेको छ कि अब मलको आपूर्ति सहज हुन्छ । तर यसभित्र लुकेको खतरनाक रहस्यलाई भने लुकाइएको छ । अब नेपालले भारतबाहेक अन्य मुलुकबाट मल खरिद नगर्ने भित्री सहमतिमा यो सम्झौता सम्भव भएको हो ।

जसरी नेपालले पेटोलियम पदार्थ भारतभन्दा अरु देशबाट आयात गर्न सक्दैन त्यसरी नै अब रासायानिक मल पनि नेपालले भारतबाहेक अन्य देशबाट खरिद गर्न नपाउने गरी उक्त जिटुजी सम्झौता भएको छ ।

नेपाललाई सदैव भारतनिर्भर बनाउने यो रणनीति अन्तर्गत अब नेपालले भारत बाहेकका कुनै पनि देशबाट रसायनिक मल किन्न पाउने छैन भने नेपाललाई रसायनिक मल आपूर्ति गर्न चाहाने भारतबाहेकका देशलाई भारतले रसायनिक मल नेपाल निर्यात गर्न उक्त जिटुजी सम्झौतालाई अगाडि तेर्साएर रोक्ने छ ।

यसबाट भारतलाई करिब रु. २२ अर्ब जति फाइदा हुने र नेपालले भारतले भनेको मूल्यमा मल किन्नु पर्ने बाध्यता सिर्जना भएको छ । यस सम्झौताले सबैभन्दा बढी घाटा चीनलाई हुने भएको छ । चीनबाट नेपालले रसायनिक मल ल्याउन नपाओस भन्ने भित्री उद्देश्य राखी यो सम्झौता भएको सूत्रको दावी रहेको छ ।