कांग्रेस कैलाली अधिवेशनः कोइराला समूहको समर्थन बमको प्यानललाई

१८ फागुन, धनगढी । नेपाली कांग्रेस कैलालीको जिल्ला अधिवेशन अन्तरगत सभापति चयनका लागि हुने दोश्रो चरणको निर्वाचनमा कोइराला समूहले प्रकाश बम नेतृत्वको प्यानललाई सहयोग गर्ने भएको छ । बुधबार धनगढीमा बम र कोइराला समुहद्वारा संयुक्त पत्रकार सम्मेलन आयोजना गर्दै कोइराला समूहले प्रकाश बम समुहलाई समर्थन गर्ने निर्णय गरेको जानकारी दिएको छ ।

कोइराला समुहका नेता ताथा पूर्व जिल्ला सभापति तथा पुर्व केन्द्रीय सदस्य चन्द्रशेखर भण्डारीले कांग्रेसलाई सही दिशामा लैजाने शक्ति बममा रहेको हुँदा उनलाई सघाउने निर्णय गरिएको बताए । जिल्लामा गुटको राजनीति गर्दै एक सहमुहलाई भित्तामा च्याप्न खोजिएको भन्दै उनले त्यसलाई चिर्नु आवश्यक रहेको बताए ।

कांग्रेस कैलालीको सभापतिका लागि भएको पहिलो चरणको निर्वाचनमा संस्थापन पक्षबाट नारायणदत्त भट्ट, प्रकाश बहादुर बम र शेखर कोइराला समुहबाट रामबहादुर कलेल बीच प्रतिष्पर्धा भएको थियो । पहिलो चरणमा कुनै पनि उम्मेदवारले ५१ प्रतिशत मत ल्याउन नसकेपछि सभापतिका लागि दोश्रो चरणमा प्रतिष्पर्धा हुने भएको हो । पहिलो चरणबाट नै पराजित भएका कोइराला समुहका उम्मेदवार रामबहादुर कलेलसहितको उपस्थितिमा बुधबार प्रकाश बमलाई सघाउने निर्णय गरेको जानकारी गराइएको हो ।

पहिलो चरणमा सभापतिका उम्मेदवार प्रकाश बलमे १ हजार १६९ मत पाएका थिए भने, नारायणदत्त भट्टले १ हजार ७२ मत पाउँदा कोइराला समुहका उम्मेदवार रामबहादुर कलेलले १ सय ९७ मत पाएका थिए । सभापतिका लागि हुने दोश्रो चरणको मतदानमा कोइराला समुहनै निर्णायक हुने देखिएको छ ।

संयुक्त पत्रकार सम्मेलनमा बोल्दै कांग्रेस कैलालीका निवर्तमान सभापति नरनारायण शाह ‘मनु’ले पहिलो चरणमा पाएको मतले हौसला थपिएको र दोश्रो चरणमा प्रकाश बम समुहको जीत सुनिश्चित भएको बताए । अहिले पनि अर्को समुहबाट नेता कार्यकर्तालाई प्रलोभन र धम्की आइरहेको भन्दै त्यस्ता प्रलोभनमा नफस्न उनले आग्रह गरे । ‘हामी सजिलै विजयी हुन्छौं,’ मनुले भने, ‘कार्यकर्ताले विचारलाई चिनेका छन्, उहाँमा गुटको भावना छैन, संघर्ष गर्नेहरु इमान्दार कांग्रेसीजनलाई उहाँले एक ठाउँमा ल्याउन सक्नु हुन्छ ।’

प्रकाश बलमे एक,डेढ बर्ष अघिदेखिनै सभापतिमा लड्ने भन्दै आफुसँग सल्लाह गरेको र उहाँलाई सोही समयमा आफुले समर्थन गर्ने वाचा गरेको उनले बताए । ‘बमलाई मैले पहिलानै वचन दिइसकेको थिए,’ उनले भने, ‘म वचनमा बाँधिएको थिए र उहाँलाई सहयोग गरे, सहयोग गर्दा मलाई पश्चाताप पनि छैन ।’

कांग्रेस कैलालीको निर्वाचनमा नारायणदत्त भट्टलाई संस्थापन पक्षले आधिकारिक उम्मेदवारका रुपमा अघि बढाएको थियो । भट्ट प्यानललाई कांग्रेस केन्द्रीय सदस्य, डाक्टर रणबहादुर रावल, जनक चौधरी, नृपबहादुर वड, शुशीला मिश्र भट्ट, जीवन राना लगायतका नेताले समर्थन गरेका थिए भने, प्रकाश बम प्यानललाई निवर्तमान सभापनि नरनारायण शाह ‘मनु’ ले समर्थन गरेका थिए ।