सर्वोच्चमा श्रेष्ठ र उच्च अदालतमा कुँवर

२६ फागुन, काठमाडौं ।  न्यायपरिषदले उच्च अदालत विराटनगरका मुख्यन्यायाधीश तिलप्रसाद श्रेष्ठलाई सर्वोच्च अदालतको न्यायाधीशमा सिफारिस गरेको छ ।

बिहीबार बसेको न्यायपरिषदको बैठकले उनलाई सर्वोच्च अदालतको न्यायाधीशमा सिफारिस गरेको न्यायपरिषदका प्रवक्ता मानबहादुर कार्कीले जानकारी दिए ।

बैठकले सर्वोच्च अदालतका मुख्य रजिष्ट्रार लालबहादुर कुँवरलाई उच्च अदालतको न्यायाधीशमा सिफारिस गरेको छ । श्रेष्ठको नाम संसदीय सुनुवाइबाट अनुमोदन हुनुपर्छ भने कुँवरलाई अब कामू प्रधानन्यायाधीश दीपककुमार कार्कीले उच्च अदालतको न्यायाधीशमा नियुक्त गर्नेछन् ।

संसदीय सुनुवाइ समितिबाट नाम अनुमोदन भएमा तिलप्रसाद श्रेष्ठ २०८३ भदौ १३ गतेसम्म सर्वोच्च अदालतको न्यायाधीश हुनेछन् । सर्वोच्च अदालतमा एक जना न्यायाधीशको पद खाली थियो । सर्वोच्चमा प्रधानन्यायाधीशसहित २१ जना न्यायाधीश हुने व्यवस्था छ ।

यता, पाँच सदस्यीय न्यायपरिषदमा सर्वोच्च अदालतको न्यायाधीश सिफासिरमा एकमत नभएको बताइएको छ । लगातार विभागबाट मात्रै सर्वोच्चमा न्यायाधीश सिफरिस गएिको भन्दै बाहिरबाट गएका न्यायपरिषद सदस्यसहित कानूनमन्त्री समेत सन्तुष्ट नभएको स्रोतको भनाई छ ।

उनीहरुले सर्वोच्चको न्यायाधीशमा बाहिरका वरिष्ठ कानून व्यावसायीहरुबाट ल्याउनुपर्ने धारणा राखेका थिए ।