जागिरको प्रलोभनमा ठगेर विदेश भाग्नेलाई इन्टरपोल लगाएर कारबाही गर्ने श्रममन्त्रीको चेतावनी

२ चैत, काठमाडौं ।  श्रम, रोजगार तथा सामाजिक सुरक्षामन्त्री कृष्णकुमार श्रेष्ठले विदेश पठाएर जागिर दिन्छु भन्दै श्रमिक ठगेर विदेश भाग्ने जो कोहिलाई पनि अन्तर्राष्ट्रिय प्रहरी अपराध संगठन (इन्टरपोल) लगाएर कारवाही गर्ने चेतावनी दिएका छन् ।

संयुक्त अरब इमिरेट्स (यूएई) भ्रमणमा रहेका मन्त्री श्रेष्ठले आबुधावीस्थित नेपाली दूतावासद्वारा आयोजित कार्यक्रममा नेपाली समुदायसँग छलफल गर्दै जागिर दिन्छु भन्दै ठग्नेलाई जहाँ भेटे पनि कारबाही गर्ने चेतावनी दिएका हुन् ।

उनले नेपालबाट रोजगारीका लागि विदेश जान चाहनेहरुलाई राम्रो ठाउँमा पठाए दिने र तलव पनि राम्रो हुने भन्दै गैरकानूनी रुपमा ठगेर विदेश भागेकाहरु धेरै भएको र उनीहरु खाडी मुलुक वा अन्य कुनै देशमा लुकेर बसेको भएपनि इटरपोल लगाएर खोजि गरी ठाउँका ठाउँ कारवाही गरिने बताए ।

मन्त्री श्रेष्ठले त्यस्ता व्यक्तिलाई कानुनी दायरामा ल्याउन इन्टरपोलसंग सहयोगका लागि आग्रह गरिएको र यसले वैदेशिक रोजगारीलाई सुरक्षित र व्यवस्थित गर्ने भन्दै गैरकानुनी काम गर्ने नेपालीहरू विदेशी भूमिमा अब नजोगिने बताए ।

उनले नक्कली मागपत्र बनाउने, झुटो आश्वासन र रोजगारीको प्रलोभन देखाएर कानुनले तोकेको प्रक्रियायाभन्दा बाहिरबाट नेपालीलाई यूएई ल्याउने कार्यमा संलग्न व्यक्तिलाई कारबाही गरेरै छाड्ने बताएका हुन् ।

नेपाली नागरिकलाई यूएईमा अलपत्र पार्ने संस्था वा व्यक्तिलाई कारबाहीको दायरामा ल्याउन र पीडितलाई कसरी न्याय दिलाउन सकिन्छ भन्नेबारे मन्त्री श्रेष्ठले नेपाली समुदायबाट सुझाव लिएका थिए । उनले इन्टरपोलबाट ‘रेड नोटिस’ जारी गरेर दलालको खोजी गरी कारबाहीको दायरामा ल्याउन लागिएको जानकारी दिए ।

नेपाली नागरिकलाई यूएईमा अलपत्र पार्ने संस्था वा व्यक्तिलाई कारबाहीको दायरामा ल्याउन सजिलोका लागि नेपाल प्रहरीको केन्द्रीय अनुसन्धान ब्युरोका डीएसपीलाई जिम्मेवारी दिएको बताए ।