एनआरएनएमा महाधिवेशनै महाधिवेशन

८  चैत, काठमाडौं ।  गैर आवासीय नेपाली संघ (एनआरएनए) का पूर्व अध्यक्ष शेष घले समुहले काठमाडौंमै महाधिवेशन गरिहँदा एनआरएनएका अध्यक्ष कुमार पन्तले संघको १० औँ महाधिवेशन चैत १० र ११ गते काठमाडौंमा हुने बताएका छन् ।

मंगलबार एनआरएनएले काठमाडौंमा पत्रकार सम्मेलन गर्दै विधानसम्मत दशौँ महाधिवेशन गर्ने जानकारी दिएको हो । पत्रकार सम्मेलनमा बोल्दै अध्यक्ष कुमार पन्तले एनआरएनए एक र एकताबद्ध रहने दाबी गर्दै नेपालको सामाजिक तथा आर्थिक समृद्धिको निम्ति प्रभावकारी भूमिका खेल्ने बताए। पन्तले अधिवेशनबाट तीनैजना अध्यक्षका उम्मेदवारहरूले मिलेर संस्थालाई अघि बढाउने सहमति भएको उल्लेख गरे ।

त्यस्तै, अध्यक्षका उम्मेदवार डा. बद्री केसीले अहिलेको अवस्थामा संस्थामा बृहत् आमसहमति गर्नुबाहेक अन्य कुनै विकल्प नभएको बताए । उनले हरेकले आफ्नो व्यक्तिगत स्वार्थभन्दा संस्थाको स्वार्थलाई माथि राखेर अघि बढ्न आवश्यक रहेको भन्दै अध्यक्षका तीनै प्रत्याशीहरू मिलेर संस्थालाई अघि बढाउने बताए ।

अध्यक्षका अर्का प्रत्याशी कुल आचार्यले पदका लागि भन्दा पनि संस्था बचाउने निर्णयमा पुगेको बताए । उनले सबै गैरआवासीय नेपालीहरूले राष्ट्रिय सहमतिको अधिवेशन गर्नेमा जोड दिइरहेको पनि उल्लेख गरे ।

त्यस्तै, अध्यक्ष पदका अर्का प्रत्याशी रविना थापाले संस्थामा भएका विवादहरूलाई समाधान गरेर सहमतिमा अघि बढ्ने बताइन्। उनले अहिलेको एनआरएनएको अवस्थालाई सहमति र सहकार्यबेगर अघि लैजान गाह्रो भएको प्रस्ट पारिन् ।