विद्युत महसुल बढेको भन्दै भारतले दिएन नेपाललाई मागेको विजुली

९ चैत, काठमाडौं ।  नेपाल विद्युत प्राधिकरणले भारतसँग गरेको सम्झौता अनुसार भारतले विद्युत निर्यात नगरेपछि नेपालमा समस्या उत्पन्न हुने देखिएको छ । गएरातिदेखि भारतबाट नेपालले आयात गर्दै आएको विद्यतु घटेको छ ।

भारतीय उर्जा व्यापारमा विद्युत् महसुल महँगो हुँदा त्यसको प्रत्यक्ष असर नेपालमा परेको हो । नेपालले सम्झौता अनुसारको मूल्यमा विद्युत् नपाएपछि भारतबाट विद्युत् आयात घटेको छ । मंगलबार रातिदेखि नेपालले भारतबाट यसअघि आयात गरेको परिमाणमा बिजुली पाउन नसकेको हो ।

नेपाल विद्युत् प्राधिकरणका अनुसार भारतमै बिजुलीको मूल्य प्रतियुनिट भातीय २० रुपैयाँ पुगेको छ । नेपाललाई बिक्री गर्ने एजेन्सीहरूले आठदेखि १० भारुमा सम्झौता गरेकाले आयात प्रभावित भएको हो । भारतबाट विद्युत् आयात भने रोकिएको छैन् ।

नेपालले प्रति युनिट ३० भारुमा अहिले २०० मेगावाट हाराहारी विद्युत् भारतबाट आयात भइरहेको  छ । भारतबाट बिजुली आयात कम भएपछि भैरहवा क्षेत्रका उद्योगहरूले नियमित रूपमा विद्युत् नपाएको गुनासो गरेका छन् ।

उद्योगहरूले नियमित बिजुली नपाएको गुनासो गर्दै भारतबाट बिजुली कम आएको भन्दा पनि भारतबाट आयात गरिएको बिजुली कम गुणस्तरको भएकाले ट्रेपिङ भएको गुनासो व्यवसायीले गरेका छन् ।