सशस्त्र प्रहरीमा ‘ज्वाई’ एसएसपीको रजाई

१५ चैत, काठमाडौं । सशस्त्र प्रहरीको नेतृत्व परिवर्तनको सम्मुखमा संगठनभित्रकै बिचौलियाहरुको चलखेल शुरु भएको छ । सशस्त्र प्रहरी महानिरीक्षक शैलेन्द्र खनालको अवकाशको मिति नजिकिदै गर्दा आफूलाई कांग्रेस निकट भन्दै एक एसएसपीले प्रतिस्पर्धामा रहेका तीन जना डीआईजीलाई दुःख दिन थालेका छन् ।

नेपालको अर्ध सैन्य बल सशस्त्र प्रहरीको नेतृत्व परिवर्तनको सम्मुखमा एसएसपी दीपेन्द्र कुँवर (ख) ले कांग्रेसको सबै पक्षलाई मिलाउने भन्दै दुःख दिन थालेका हुन् । नेपाली सेनाबाट स्टाफ कलेज पास गरेर भर्खरै मूख्यालयमा हाजिर भएका एसएसपी कुँवरले संगठनभित्र आफूलाई सधैं अरुभन्दा भिन्न रुपमा प्रस्तुत गर्ने गरेका छन् ।

उनीभन्दा सिनियर तथा जुनियर कर्मचारीलाई रौं जत्तिको पनि नगन्ने उनको पुरानो शैलीले संगठनभित्रका अधिकारीहरु सधैं अन्यौलमा पर्ने गरेका छन् । प्रधानमन्त्री शेरबहादुर देउवाका स्वकीय सचिव भानु देउवाका बहिनी ज्वाई रहेका कुँवरकाे हर्कतले संगठनभित्र सधै चर्चा पाउने गरेको छ । अहिले पनि उनले तीनजना डीआईजीलाई आईजीपी बनाउने भन्दै बोकेर हिड्न थालेका छन् ।

डीआईजीत्रय राजु अर्याल, नारायणदत्त पौडेल र सीपी गौतम तीन जनालाई आईजीपी बनाउने भन्दै बोकेर हिड्न थालेका हुन् । तर उनीहरुले एसएसपी कुँवरलाई भने नचिढ्याउने नीति लिएका कारण चुपचाप बसिररहेको स्रोतले जनाएको छ ।

दुई साता अघि मूख्यालयमा हाजिर भएका एसएसपी कुँवरले त्यहाँ रहेका एक डीएसपीलाई सबैको सामू मुख छाडेर गाली गरेका थिए । कुँवरको जागिर लामो समय नभएपनि लामो करियर भएर एक डीएसपीलाई मुखमा आएजति सबैचिज भन्न बाँकी राखेका थिएनन् । भानु देउवाको नाम भजाएर संगठन प्रमुखलाई पनि आफ्नो वशमा राख्न पल्केका कुँवरले अहिले हुनेवाला आईजीपीलाई पनि आफ्नो पहुँचमा राख्न चाहिरहेका छन् ।

सोही कारण प्रतिस्पर्धामा रहेका तीन डीआईजीलाई समदुरीमा राखेर व्यवहार गरिरहेका छन् । ‘एसएसपी कुँवरलाई कुनै पनि विभागमा जान र बस्न रोकतोक छैन, पहिला पनि यस्तै अवस्था थियो अहिले त प्रधानमन्त्री भएको बेला झन ठूलो स्वरले हप्कीदप्की गरिरहेका छन्’, सशस्त्र मूख्यालयका एक अधिकृतले भने । उनका अनुसार समयमा कार्यालय नआउने, प्रधानमन्त्री कार्यालय र गृहमन्त्रालयमा मात्रै रहने गरेका उनले सरुवाको सेटिङ समेत मिलाउने गरेका छन् ।

निर्वाचनको सम्मुखमा आईजीपी परिवर्तन हुनलाग्दा एसएसपी कुँवरले जो आईजीपी भएपनि आफ्नै कारणले भएको सन्देश दिनका लागि उनीहरुकै कार्यकक्षमा गएर शक्तिकेन्द्रमा फोन लगाउने गरेका छन् । ‘धेरैजसो समय भानु देउवासँगै कुराकानी गर्ने उनले डीआईजीको कार्यकक्षमा बसेर मोवाइल ‘लाउडस्पिकर’मा राखेर कुराकानी गर्ने गरेको स्रोतले जनाएको छ । ‘उहाँलाई कसैले पनि रोक्ने गरेको छैन, अन्य अधिकृतलाई मोवाइल चलाउन रोक छ तर उहाँलाई लाउडस्पिकरमा राखेर बोल्न छुट छ’, मूख्यालय स्रोतले भन्यो । उनी धेरैजसो समय आईजीपीको सचिवालय वरिपरी नै बस्ने गरेका छन् ।

सशस्त्र प्रहरीको स्टाफ कलेजमा नाम निकाल्न नसकेपछि सशस्त्रको कोटालाई दुरुपयोग गर्दै भानु देउवाको सोर्समा आर्मीको स्टाफ कलेजमा तालिम लिएका थिए । उनको सो तालिम दुई साता अघि मात्रै सकिएको थियो । मूख्यालयमै बस्न चाहेका कारण उनलाई अहिले कतै खटाइएको छैन ।