स्थानीय तह निर्वाचन : स्पष्ट खाका नआउँदा अन्योल

♦ शेरबहादुर सिंह

२४ चैत, महेन्द्रनगर । दुई दिनअघि नेपाली कांग्रेस कञ्चनपुरको पार्टी कार्यालयमा पाँच दलीय गठबन्धनको बैठक बस्यो । कांग्रेसका पार्टी सभापति पदम बोगटीको संयोजत्कवमा बसेको बैठकले केन्द्रको सहमतिअनुसार आपसी समझदारी र सहकार्य गरी स्थानीयस्तरमा तालमेल गर्ने निर्णय ग¥यो ।

केन्द्रदेखि पार्टीको जिल्ला तहसम्म गठबन्धन गरेर निर्वाचनमा जाने एकखाले समझदारी बने पनि कांग्रेसभित्र पालिकास्तरमा भने गठबन्धन गर्ने निर्णयप्रति असन्तुष्टि व्यक्त हुन थालेको छ । जिल्लामा भएको समझदारीको दुई दिन नबित्दै मंगलबार नेपाली कांग्रेस भीमदत्त नगर कमिटीले भीमदत्तमा कांग्रेसले बिनागठबन्धन निर्वाचन लड्ने निर्णय गरेको छ ।

नगरसभापति अच्युतराज कलौनीको अध्यक्षतामा बसेको बैठकले यहाँ गठबन्धन नगर्ने निर्णय गरेपछि यहाँको चुनावी माहोल तरङ्गित बनेको छ । यसअघि विसं २०७४ को निर्वाचनमा नेकपा ९एमाले०का उम्मेदवार सुरेन्द्र विष्ट नगरप्रमुखमा निर्वाचित भएका थिए । एमालेसँग कांग्रेसका नेता बोगटी झिनो अन्तरले पराजित भएका थिए । अहिले बोगटी पार्टी सभापति छन् भने एमालेबाट नगरप्रमुख जितेका विष्ट पनि पार्टीको जिल्ला अध्यक्ष पदमा छन् ।

दुई पालिका र सात नगरपालिका रहेको कञ्चनपुरमा यसअघि कांग्रेसले शुक्लाफाँटा र दोधारा चादँनी नगरपालिकाको नगरप्रमुख पदमा जितेको थियो । एमालेमा आएको फुट र जिल्लामा माओवादीको अवस्था कमजोर रहेकाले आफूहरु पार्टीलाई यहाँ एक्लै लड्न दबाब दिने कांग्रेसका एक नेताले बताए । कञ्चनपुरको भीमदत्त, दोधारा चादँनी, शुक्लाफाँटालगायत पालिकामा कांग्रेसको अवस्था मजबुत मानिन्छ ।

पालिकाको निर्वाचन एक्लै लड्न हौसिएका कांग्रेसका केही नेता तथा कार्यकर्ताले पनि सामाजिक सञ्जालमा समेत गठबन्धनको विरोध गरिरहेका छन् । कांग्रेस भीमदत्त नगर कमिटी सचिव राहुल भट्टले भीमदत्तमा आफ्नै पार्टीभित्र एकताबद्ध गरेर निर्वाचनमा जाने बताए । “यहाँ अहिले नगरप्रमुखमा १० र उपप्रमुखमा सात आकाङ्क्षी देखिएका छन्”, उनले भने, “गठबन्धन नगरेरै जानेमा नगर कमिटीमा एकमत छ ।”

भीमदत्तमा एमालेलगायत दलहरूले पनि उम्मेदवारको टुङ्गो लगाउन बाँकी छ । एमालेका नेताले चुनावी तालमेलका लागि राष्ट्रिय प्रजातन्त्र पार्टीका नेतासित छलफल अघि बढाएका छन् । हालसम्म भीमदत्त नगरप्रमुखमा स्वतन्त्रबाट व्यवसायी इञ्जीनियर कोमलबहादुर सिंहले उम्मेदवारी घोषणा गरिसकेका छन् ।

कांग्रेस पुर्नबास नगर कमिटी पनि कार्यकर्ताको भावनाविपरीत गठबन्धन नगर्ने भन्दै आन्तरिक छलफलमा जुटेको छ । कांग्रेसकै कञ्चनपुरका जिल्ला सचिव हेमराज ओझाले गठबन्धन हुनेमा बिमति नरहेको बताए । “गठबन्धनमा ठूला दलमा धेरै आकाङ्क्षी हुनु स्वाभाविक हो”, उनले भने, “अहिले सामान्यरूपमा देखिएको असहमतिलाई साम्य पारेर एकताबद्ध भएर निर्वाचनमा जान्छौँ, नौवटा पालिकामध्ये पाँचवटामा कांग्रेसको नेतृत्व रहन्छ । पार्टीको निर्णय सबै तहमा नेता तथा कार्यकर्ताले मान्ने नै छन् ।”

त्यसैगरी नेकपा ‘एकीकृत समाजवादी’का जिल्ला सचिव हरकसिंह धामीले यहाँ पनि पाँच दलीय गठबन्धन निर्वाचनमा जाने निश्चित भइसकेको बताए । “केन्द्रबाट गठबन्धनबारे स्पष्ट खाका नआएकाले संयुक्त छलफल हुन पाएको छैन”, उनले भने, “माथिको खाका जिल्लामा आएपछि पालिका बाँडफाँटको विषय अघि बढ्छ ।

”सचिव धामीले जिल्लामा पनि गठबन्धनसित आवद्ध दलबीच सद्भाव कायम गर्दै सौर्हादपूर्ण वातावरणमा निर्वाचनमा जान समझदारी बनेको बताए । “ठूला दल भएकाले कांग्रेसभित्र पार्टीका पालिकास्तरका कमिटीले दबाब बढाउनु स्वाभाविक हो”, उनले भने, “गठबन्धन अहिलेको राष्ट्रिय आवश्यकता पनि हो ।” रासस