सशस्त्र प्रहरीमा दुई दर्जन अधिकारीहरुको भागाभाग

२ वैशाख, काठमाडौं । सशस्त्र प्रहरीमा यतिबेला दुई दर्जन अधिकारीहरुको भागाभाग भएको छ । तत्कालीन सशस्त्र प्रहरी महानिरीक्षक ‘आईजीपी’ शैलेन्द्र खनालको सचिवालयमा बसेका र उनी निकट भएर काम गरेका अधिकारीहरुलाई पेल्न शुरु भएपछि भागभाग भएको हो ।

यतिबेला आफू अनुकुल रहेको स्थानमा रमाना लिएर जाने र सचिवालयमा हाजिर हुन आउनेहरुको सचिवालयमा घुइचो लागेकाे छ । सशस्त्र प्रहरी बलमा प्रवक्ताको जिम्मेवारी लिइरहेका एसएसपी कमलप्रसाद तिउसिना हटाइएका छन् । उनको स्थानमा डीआईजी विदुर खड्कालाई ल्याइएको छ ।

तिउसिनालाई त्यहाँ आएको तीन महिना पनि नपुगी हटाइएको हो । तिउसिना यसअघि खनाल निकट रहेर काम गरेका एसएसपी हुन् । प्रवक्ताको जिम्मेवारीमा आउनु अघि उनको कार्यालयमा गृहमन्त्रालयले छापा मारेर कागजपत्र समेत नियन्त्रणमा लिएको थियो ।

उनी मिडियाप्रति सकारात्मक नहुने भएकै कारण त्यहाँबाट हटाइएको स्रोतको दावी छ । त्यसैगरी विशेष व्यूरोमा रहेका शेरबहादुर अधिकारीलाई पनि हटाइएको छ । उनलाई साे स्थानबाट भानु देउवाका ज्वाई दीपेन्द्र कुँवरले हटाउन लगाएका थिए । उनी त्यहाँ आएका छन् । उनलाई मिडियामा समाचार दिएको आरोपमा हटाउन लगाइएका छ । हल्चाेकस्थित प्रधान कार्यालयमा उनै कुँवरको आतंक रहेको छ । सशस्त्र मुख्यालयमा त्यसलाई ‘ज्वाई’ आतंक नामाकरण गरिएकाे छ ।

त्यसैगरी खनालका स्वकीय पीएसओ रहेका नारायण गुरुङले २० दिनको बिदा लिएका छन् । उनी नयाँ आईजीपी नियुक्ति हुने बेलामा मात्रै मूख्यालयमा हाजिर हुनेछन् । त्यसैगरी तत्कालीन सचिवालय मातहत रहेर काम गरेका प्रहरी कर्मचारीहरुको अहिले प्रहरी मूख्यालयमा हाजिर गर्न भ्याइनभ्याई रहेको स्रोतले जनाएको छ ।

‘आईजीपी रिटायर्ड भएपछि त्यहाँ सचिवालयमा रहेकाहरुलाई पेलेर राख्ने र सकेसम्म टाढा धपाउने काम गरिन्छ यस्तो सधैं भैरहन्छ’, मूख्यालयका एक अधिकारीले भने । उनका अनुसार १९ दिनका लागि आईजीपी नियुक्त भएका पुष्पराम केसीसँग नजिक भएका अधिकारीहरुले अघिल्लो सचिवालयमा रहेका अधिकारीहरुलाई पेल्न शुरु गरेका हुन् ।