सशस्त्र प्रहरी तस्करी र अपराध नियन्त्रण गर्न सक्रिय, कुखुरासहित चारवटा मोटरसाइकल नियन्त्रणमा

♦जगन्नाथ साह सोनी

२ बैशाख, सर्लाही ।  सर्लाहीस्थित सशस्त्र प्रहरी तस्करी र अपराध नियन्त्रण गर्न कस्सिएको छ । सशस्त्र प्रहरी सीमा सुरक्षा बलले भारतबाट अवैध रुपमा नेपाल ल्याउँदै गरेका ब्रोइलर कुखुरासहित चारवटा मोटरसाइकल नियन्त्रणमा लिएको छ ।

शुक्रबार बिहानको समयमा तीनवटा भारतीय नम्बर प्लेट भएका र एउटा नेपाली नम्बर प्लेट भएको मोटरसाइकलमा कुखुरा लोड गरी ल्याउँदै गरेको अवस्थामा नियन्त्रणमा लिइएको हो । कुखुरा ओसारपसारमा संलग्न व्यक्तिहरु भने फरार भएका छन् ।

बीओपी सखुअवाका प्रहरी नायव निरीक्षक रमेश घिमिरेको नेतृत्वमा गएको सुरक्षा टोली र प्र बल १० नं. गण सर्लाहीबाट सप्रनि रामकेवल राय यादव र प्रज रोशन मिश्रको स्वायड टोलीले नेपाल भारत सीमानाकाे दशगजा इलाकामा भारतबाट ल्याउँदै गरेको सूचनाका आधारमा अवैध रूपमा भित्र्याउन लागिएकाे ब्रोइलर कुखुरासहित चारवटा वटा मोटरसाइकल नियन्त्रणमा लिएको हो ।

शुक्रबार बिहान ६ बजेको समयमा भारतबाट अवैध रुपमा कुखुरा ल्याउँदै गरेको सूचनाका आधारमा पर्सा गाउँपालिक ६ स्थित नेपाल भारत सीमा अन्तरगत दशगजा क्षेत्रमा सुरक्षा टोली पुग्ने वित्तिकै कुखुरा बोकेर आएका व्यक्तिहरु मोटरसाइकल छोडेर भागेको सशस्त्र प्रहरीले जनाएको छ ।

कुखुरा ओसार्दै गरेको बेला सशस्त्र प्रहरीले जाँच गरिरहेको देखेर मोटरसाइकल छाडेर ओसार्ने व्यक्ति फरार भएका थिए । अवैध रुपमा ओसारिएको अवस्थामा बरामद गरिएका कुखुरा र मोटरसाइकल सशस्त्र प्रहरीको बीओपीमा ल्याएर राखिएको सशस्त्र प्रहरी नायव निरीक्षक रमेश घिमिरेले जानकारी दिए ।

बरामद भएका कुखुरा ६८० केजी र साेको मुल्य २ लाख पर्ने बताइएको छ । यस्तै मोटर साइकलको मुल्य २ लाख ४० हजार भन्दा बढी पर्ने बताइएको छ । बरामद कुखुरा पशु क्वारेन्टाइनसँग सल्लाह गरी नष्ट गरिने र मोटरसाइकल भन्सार कार्यालयमा बुझाइने भएकाे छ ।

भारतमा उत्पादन लागत कम पर्ने भएकाले कुखुरा सस्तोमा पाइन्छ । बर्डफ्लु जस्ता रोग फैलिने भएकाले कुखुरा ओसारपसार निषेधित छ । तर, व्यापारीले अबैध रुपमा कुखुरा ओसार्ने गरेका छन् ।