बैतडीमा वडा सदस्यका उम्मेदवार माथि खुकुरी प्रहार, टाउमा गहिरो चोट

२० वैशाख, बैतडी । स्थानिय तहको निर्वाचन नजिकिदै गर्दा बैतडीमा वडा सदस्यका उम्मेदवार माथि खुकुरी प्रहार भएको छ । जिल्लाका डिलासैनी गाउँपालिका वडा नं ५ का वडा सदस्य हरिराम साउँदमाथि सोमबार राती खुकुरी प्रहार भएको हो ।

प्रहरीका अनुसार साउँद नेकपा माओवादी केन्द्रबाट वडा सदस्यका उम्मेदवार छन्। ६० बर्षिय साउँदमाथि गएराती स्थानीय एमाले कार्यकर्ताले खुकुरी प्रहार गरेको आरोप छ।

माओवादी केन्द्रबाट उम्मेदवार बनेका उनीमाथि अजित साउँदको समूहले आक्रमण गरेको आरोप छ । तर उनीहरुको खोजी भइरहेको प्रहरीले जनाएको छ ।

गम्भीर घाइते भएका साउँदको टाउको र शरीरमा गहिरो चोट लागेको छ । स्थानीय गोकुलेश्वर अस्पतालमा समान्य उपचारपछि उनलाई उपचारका लागि धनगढी रिफर गरिएको प्रहरीले जनाएको छ ।