संघीयता विरोधीहरुलाई परास्त गर्न गठबन्धनले जित्न आवश्यक छः प्रधानमन्त्री देउवा

२५ वैशाख, पोखरा । प्रधानमन्त्री एवं नेपाली कांग्रेसका सभापति शेरबहादुर देउवाले संघीयता विरोधी गतिविधि रोक्नका गठबन्धन गरिएकाले यसलाई जिताउन आवश्यक रहेको बताएका छन् । उनले गठबन्धन पराजित भए देशमा स्थायित्व र स्थिरता नहुने बताएका छन् ।

पाँच दलीय गठबन्धनले पोखरामा आयोजना गरेको चुनावी सभालाई आइतबार सम्बोधन गर्दै देउवाले केपी शर्मा ओलीका गतिविधि गणतन्त्र र संघीयता विरोधी भएको बताए । उनले ओलीले अझै पनि प्रजातन्त्र पक्षधरकोबिरुद्धमा षड्यन्त्र गरिरहेको बताए ।

देउवाले संसद्मा कांग्रेसको विरोध सहन नसकेर ओलीले संसद् भंग गरेको बताउँँदै ओलीको शासन संसदीय व्यवस्था विरोधी भएको दावी गरे । उनले कांग्रेसका लागि गठबन्धन सबैभन्दा बढी आवश्यक भएकोले गठबन्धनलाई जोगाउन र यसको उम्मेदवारलाई जिताउन आग्रह गरे ।

गठबन्धन राष्ट्रिय र ऐतिहासिक आवश्यकता भएको भन्दै उनले गठबन्धनलाई कुनै किसिमको शंका, उपशंका गर्ने काम नगर्न कांग्रेस कार्यकर्तालाई आग्रह गरे । गठबन्धनलाई सफल पार्ने कांग्रेसको कर्तव्य भएको उनको भनाई थियो ।