ओलीलाई उत्तर दिन कांग्रेसले पनि राख्यो पत्रकार सम्मेलन

२६ वैशाख, काठमाडौं । नेपाली कांग्रेसले स्थानीय तह निर्वाचनको पछिल्लो अवस्थाबारे जानकारी दिन पत्रकार सम्मेलनको आयोजना गर्दैछ । चुनावको चार दिन मात्र बाँकी रहँदा कांग्रेसले आज सोमबार काठमाडौंमा पत्रकार सम्मेलन गर्ने भएको हो ।

पत्रकार सम्मेलनमा आइतबार नेकपा एमालेका अध्यक्ष केपी शर्मा ओलीले पार्टी कार्यलयमा पत्रकार सम्मेलन गरी र देशका विभिन्न ठाउँमा राखिएका चुनावी सभालाई सम्बोधन गर्ने क्रममा कांग्रेसमाथि लगाएको आरोपहरुको खण्डन गरिनेछ । आइतबार मात्र प्रमुख प्रतिपक्षी एमाले अध्यक्ष केपी शर्मा ओलीले पत्रकार सम्मेलन गरेका थिए ।

अहिले दल र उम्मेदवारहरु चुनावी मैदानमा व्यस्त रहेपनि तत्कालै जानकारी गराउन आवश्यक रहेको भन्दै कांग्रेस प्रवक्ता डा प्रकाशशरण महतले बिहान ११ बजे पत्रकार सम्मेलन गर्न लागेका हुन् । कांग्रेस मुख्यसचिव कृष्णप्रसाद पौडेलका अनुसार कांग्रेस केन्द्रीय कार्यालयमा पत्रकार सम्मेलन हुनेछ ।