सोलुको सोलुदुधकुण्ड नगरपालिकामा कांग्रेसका शेर्पा र तामाङ विजयी

४ जेष्ठ, सोलुखुम्बु । सोलुखुम्बुको सोलुदुधकुण्ड नगरपालिकामा नेपाली कांग्रेसका नाम्गेलजाङ्बु शेर्पा विजयी भएका छन् । उपमेयरमा कांग्रेसकै गान्धिमाया तामाङ निर्वाचित भएकी छन् । मेयरमा निर्वाचित शेर्पा सोलुखुम्बु कांग्रेसका सभापति समेत हुन् ।

शेर्पाले नेकपा एमालेका उम्मेदवार आङकाजी शेर्पालाई ६ सय ७८ मतान्तरले पराजित गरेको हुन् । उनले ४ हजार ९ सय ६८ मत ल्याउँदा एमाले उम्मेदवार आङकाजीले ४ हजार २ सय ९० मत पाएका थिए । नेकपा माओबादी केन्द्रका उम्मेदवार निमातेण्डुप शेर्पाले १ हजार १ सय ८७ मत ल्याएका छन् ।

उपमेयरमा तामाङले ४ हजार ३ सय ८५ मत ल्याएर विजयी भएकी हुन् भने उनका निकटतम प्रतिस्पर्धी नेकपा एमालेकी उम्मेदवार मोहनकुमारी कार्कीले ४ हजार २ सय ७३ मत पाएकी छिन् ।

विजयी तामाङ कांग्रेसको महाधिबेशन प्रतिनिधि तथा १ नम्बर प्रदेश समिति सदस्य समेत हुन् । कुल ११ वटा वडा रहेको नगरपालिकामा ६ वटा वडामा कांग्रेस, ४ वडामा नेकपा एमाले र १ वडामा माओबादी केन्द्रका उम्मेदवारले वडाध्यक्ष जितेका छन् ।