वीरगञ्ज ६ मा लोसपाको पहिलो जित, २९ मा जसपाका चौधरी विजयी

५ जेठ, वीरगञ्ज । वीरगञ्ज महानगरपालिकाका वडा नम्बर ६ मा लोकतान्त्रिक समाजवादी पार्टी नेपाल र वडा नम्बर २९ मा जनता समाजवादी पार्टी नेपालका उम्मेदवार विजयी भएका छन् ।

महानगरको मुख्य बजार क्षेत्र पर्ने वडा नम्बर ६ मा लोसपाकाबाट जय प्रकाश अग्रवाल ‘बाङ्गे’ विजयी भएका छन् भने वडा नम्बर २९ मा जसपाबाट दोस्रो कार्यकालका लागि धमेन्द्र महत्तो चौधरी निर्वाचित भएका छन् ।

कांग्रेसका पूर्व जिल्ला उपसभापति एवम् महाधिवेशन प्रतिनिधिसमेत रहेका दिना प्रसाद गुप्तालाइ ३ सय ९१ मतको अन्तरले हराउँदै लोसपाका अग्रवाल वडा अध्यक्षमा निर्वाचित भएका छन् ।

बिहीबार बिहान सकिएको उक्त वडा नम्बर ६ को मतगणनाको अन्तिम परिणाम अनुसार लोसपाका उम्मेदवार अग्रवालले ९ सय ९४ मत पाउदा कांग्रेसका गुप्ताले भने ६ सय ३ मत मात्रै पाएका छन् । एमालेका ध्रुब लाठले ३ सय ५२ र जसपाकी रमितामाया गुप्ताले १ सय ९६ मत पाएकी छन् ।

यसअघि २०७४ को निर्वाचनमा वडा नम्बर ६ मा कांग्रेसका ध्रुब नेपाल वडाअध्यक्षमा विजयी भएका थिए । वडा नम्बर ६ कांग्रेसका पूर्व जिल्ला सभापति एवम् संविधानसभा सदस्य राजेन्द्र बहादुर अमात्य, नगरसभापति मणिन्द्रलाल नेपाली, पूर्व जिल्ला उपसभापति नरेन्द्र साह, नेता वीरेन्द्रलाल नेपाली लगायतका दिग्गज नेताहरुको गृह वडा हो ।

त्यस्तै बिहीबार बिहान सकिएको उक्त वडा नम्बर २९ मतगणनाको अन्तिम परिणाम अनुसार नेकपा एमालेका उम्मेदवार नबिजान अन्सारीलाइ ५१ मत अन्तरले पराजित गर्दै जसपाका चौधरी वडा अध्यक्षमा पुन निर्वाचित भएका छन् ।

चौधरीले १ हजार १ सय ११ मतल्याउँदा अन्सारीले भने १ हजार ६० मत पाएका छन् । यस्तै नेपाली कांग्रेसका वकिल मियाले भने ९ सय ९८ मत प्राप्त गरेका छन् ।