एमाले सचिव तथा पूर्वमन्त्रीको वडामा एमालेको लज्जास्पद हार

♦प्रकाश डोटेल

५ जेठ, स्याङ्जा । नेकपा एमालेका केन्द्रीय सचिव तथा पूर्वमन्त्री पद्माकुमारी अर्यालको वडामा नेपाली कांग्रेसको प्यानल नै विजयी भएको छ । एमालेको गढ-आधार क्षेत्र-मानिएको वालिङ नगरपालिका वडा नम्वर १४ मा कांग्रेसको प्यानल नै विजयी भएको हो ।

कांग्रेसका राजु कुँवरले वडा अध्यक्षमा ७९९ मतान्तरले एमालेका उम्मेदवार कृष्ण डुम्रेलाई पराजित गरेका छन् । अध्यक्षमा निर्वाचित कुँवरले १८ सय ९४ मत ल्याउँदा उनका प्रतिद्धन्द्धी डुम्रेले १ हजार ९५ मत प्राप्त गरेका थिए । एमालेका तर्फबाट सदस्य पदका अन्य ४ उम्मेदवारहरु समेत तीन सय बढी मतान्तरले पराजित बन्न पुगेका छन् ।

पूर्वमन्त्री अर्यालले तिवारी पसलको मतदान केन्द्रमा मतदान गरेकी थिईन् । वालिङ नगरपालिकाका अधिकांश वडामा एमाले उम्मेदवार निर्वाचित हुँदा अर्याल कै वडामा एमालेले लज्जासपद हार व्यहोर्न बाध्य भएको छ । वडामा मत बढाउनका लागि चुनावी प्रचारका क्रममा अर्यालले सो क्षेत्रमा घरदैलो समेत गरेकी थिईन् ।

पार्टीभित्रको आन्तरिक द्धन्द्ध व्यवस्थापन गर्न असफल सावित एमाले सचिव अर्याल जिल्लाका अन्य पालिकामा चुनावी रणनीतिमा समेत असफल बनेकाे आराेप लागेकाे छ । जिल्ला सदरमुकामको पुतलीबजार र गल्याङ नगरपालिकामा प्रमुख र उपप्रमुख तथा अधिकांश वडाहरुका धेरै पद एमालेले गुमाएको छ ।

अर्यालकै जोडबलमा नगरप्रमुखको उम्मेदवार बनेकी एमालेकी केन्द्रीय सदस्य सीमा क्षेत्रीले पुतलीबजार नगरपालिकामा नमिठो हार व्यहोरेकी छन् । उता अर्जुनचौपारी गाउँपालिकामा समेत आफ्नो पकड गुमाउन पुगेको एमालेको तर्फबाट जिल्ला अध्यक्ष सुर्यप्रसाद गैह्रे ‘पारस’ गल्याङको नगरप्रमुखमा पराजित बनेका छन् ।

कांग्रेसभित्रको अन्तरद्धन्द्धको फाईदा उठाउँदै एमालेले वालिङमा नगरप्रमुखमा बाजी मारेको भएपनि आफ्ना बिरोधीहरुलाई भित्तामा पुर्याउने एमाले सचिव अर्यालको रणनीतिले जिल्लाका अधिकांश वडामा पनि एमाले पराजित भएको पार्टी सम्बद्ध श्रोतले जनाएको छ ।

वालिङ नगरपालिकाको प्रमुखमा नेकपा एमालेका कृष्ण खाँणले बाजी मारेका छन् भने उपप्रमुखमा कांग्रेसकी कविता तिवारीले आफ्नो पोल्टामा पार्न सफल भएकी छिन् । नगरप्रमुखमा खाँणले व्यक्तिगत प्रयासमा बाजी मारेको एमाले श्रोतको दाबी छ । अर्यालकै गृह नगर वालिङमा कांग्रेसको कार्यपालिकामा बहुमत पुगेको छ ।

स्याङ्जा क्षेत्र नं. १ बाट संघीय संसदमा प्रतिनिधित्व गर्ने नारायण मरासिनीलाई राजनीतिक धरापमा पार्ने अर्यालको अभिष्ठले जिल्लामा एमाले समस्यामा परेको एमाले बृत्तमा चर्चा छ ।अर्यालको महत्वकांक्षाले जिल्लामा एमाले खस्कँदो र समस्याग्रस्त बन्दै गएको उनीहरुको बुझाई छ ।

यसैबीच अर्यालका श्रीमान लक्ष्मीपति पौडेल वडा सदस्यमा समेत पराजित भएका छन् । त्यो पनि २६ बर्षका सम्भव अर्यालसँग झण्डै ५ सय मतान्तरले । वालिङ १ को वडा सदस्य जितेर जिल्ला समन्वय समिति स्याङ्जाको सभापति बन्ने पौडेलको अभिलाशा श्रीमतीको बढ्दो हालीमुहालीले तुषारापात भएको एमालेकै कार्यकर्ताहरू बताउँछन् ।

उता जिल्ला समन्वय समितिका उपप्रमुख दीलिपकुमार बगाले पनि वडा सदस्यमा नै पराजित भएका छन् । बगाले वालिङ वडा नम्वर १० मा सदस्य लडेका थिए । ८० प्रतिशतको हाराहारीमा एमाले सम्बद्ध मतदाता रहेको भनिएता पनि गल्याङ ६ मा कांग्रेस बिजयी भएको छ,त्यस्तै एमालेमय दाबी गरिएको वालिङ १० मा पनि एमालेले लज्जास्पद पराजय भोगेको छ ।

स्थानीय तह निर्वाचनमा सार्वजनिक भएसँगै एमालेकी सचिव अर्यालले मन्त्री हुँदा गरेका कुकृत्यहरुको चर्चा बढ्न थालेको छ । मन्त्रीपदमा रहँदा पत्रकारलाई नगदवितरण गरेको, श्रीमानमार्फत जिल्लामा रासायनिक मलमा मनपरी गरेको, ठेक्कापट्टामा भागबण्डा लिएको, नक्कली कृषक खडा गरेर अनुदान कुम्ल्याएको जस्ता विषयहरु पछिल्लो समय जिल्लामा चर्चा छन् ।